બાલી : એર ઈન્ડિયાના એક યુવાન અને તંદુરસ્ત પાયલોટનું ઈન્ડોનેશિયાના બાલી ખાતે હાર્ટ અટેકને કારણે આકસ્મિક નિધન થયું છે. અંદાજે 40 વર્ષની વયના આ ફર્સ્ટ ઓફિસર મંગળવારે દિલ્હીથી બાલીની ફ્લાઈટ ઓપરેટ કરીને ગયા હતા અને બુધવારે તેમના નિર્ધારિત આરામ (Layover) દરમિયાન આ દુર્ઘટના સર્જાઈ હતી. એરલાઈન્સે આ ઘટનાની પુષ્ટિ કરતા ઊંડા શોકની લાગણી વ્યક્ત કરી છે.
મળતી માહિતી મુજબ, પાયલોટ પોતાની ફરજ પૂરી કર્યા બાદ બાલીની એક હોટેલમાં રોકાયા હતા. બુધવારે અચાનક તેમને છાતીમાં તીવ્ર અસ્વસ્થતા અને દુખાવો અનુભવાયો હતો. તેમને તાત્કાલિક નજીકની હોસ્પિટલમાં લઈ જવામાં આવ્યા હતા, પરંતુ ડોક્ટરોના તમામ પ્રયાસો છતાં તેમને બચાવી શકાયા નહોતા. ડોક્ટરોએ પુષ્ટિ કરી છે કે પાયલોટનું મૃત્યુ હાર્ટ અટેકને કારણે થયું છે.
તમામ મેડિકલ રિપોર્ટ્સ હતા ક્લિયર
એર ઈન્ડિયાના અધિકારીઓએ જણાવ્યું હતું કે, મૃતક પાયલોટને અગાઉથી કોઈ બીમારી કે સ્વાસ્થ્ય સંબંધી સમસ્યા નહોતી. ઉડ્ડયન નિયમો અનુસાર, તેમણે થોડા મહિના પહેલા જ તમામ જરૂરી મેડિકલ તપાસ કરાવી હતી જેમાં તેઓ સંપૂર્ણ ફિટ જાહેર થયા હતા. આ ઉપરાંત, તેઓ ડાયરેક્ટોરેટ જનરલ ઓફ સિવિલ એવિએશન (DGCA) દ્વારા નિર્ધારિત ફ્લાઈંગ અવર્સ અને ડ્યુટી લિમિટની અંદર જ કામ કરી રહ્યા હતા.
આ આકસ્મિક નિધનને પગલે એવિએશન સેક્ટરમાં ખળભળાટ મચી ગયો છે. એર ઈન્ડિયાએ સત્તાવાર નિવેદનમાં જણાવ્યું છે કે, "અમે અમારા સહકર્મીના નિધનથી અત્યંત દુઃખી છીએ. અમે પાયલોટના પરિવાર સાથે સતત સંપર્કમાં છીએ અને આ મુશ્કેલ સમયમાં તેમને તમામ સંભવિત મદદ પૂરી પાડી રહ્યા છીએ." પાયલોટના પાર્થિવ દેહને ભારત લાવવા માટેની પ્રક્રિયા હાથ ધરવામાં આવી છે. 40 વર્ષની નાની ઉંમરે ફિટ પાયલોટનું હાર્ટ અટેકથી મોત થવું એ તબીબી જગત અને એરલાઈન્સ ઉદ્યોગ માટે ચિંતાનો વિષય બન્યો છે.