રાજકોટમાં દિવાળી પર્વની ધામધૂમપૂર્વક ઉજવણી દરમિયાન ફટાકડા ફોડવાની બેદરકારી અને જોખમી આતશબાજીને કારણે આરોગ્યને મોટું નુકસાન પહોંચ્યું છે. શહેરમાં ફટાકડા ફોડતી વખતે અકસ્માતે દાઝી જવાના અને ઇજા પામવાના બનાવોમાં ચિંતાજનક ઉછાળો નોંધાયો છે. પ્રાપ્ત સત્તાવાર અને તબીબી વિગતો અનુસાર, ફટાકડાના તણખા અને વિસ્ફોટોથી શહેરભરમાં 63 જેટલા લોકો દાઝી જતાં તેમને તાત્કાલિક તબીબી સારવાર લેવી પડી હતી, જ્યારે ૪ લોકોને આંખના ભાગે ગંભીર ઈજાઓ પહોંચતાં દ્રષ્ટિ ગુમાવવાનું જોખમ ઊભું થયું હતું. રાજકોટ સિવિલ હોસ્પિટલ તેમજ શહેરની વિવિધ ખાનગી હોસ્પિટલો અને ક્લિનિક્સમાં મળીને ફટાકડા સંબંધિત કુલ 74 જેટલા ઈમરજન્સી કેસો નોંધાયા હતા.

હાથ, ચહેરો, ગળા અને પગના ભાગે ફટાકડાના સ્પાર્ક કે વિસ્ફોટથી દાઝેલા દર્દીઓ મોટી સંખ્યામાં સિવિલ અને ખાનગી દવાખાનામાં પહોંચ્યા હતા. તબીબોએ તાત્કાલિક ડ્રેસિંગ અને પ્રાથમિક સારવાર આપી સ્થિતિ કાબૂમાં લીધી હતી. મોટાભાગના દર્દીઓ સામાન્ય દાઝ્યા હોવાથી તેમને સારવાર બાદ રજા આપવામાં આવી છે. ફટાકડાના કણ કે કાગળ આંખમાં ઊડવાને કારણે 4 વ્યક્તિઓને ગંભીર ઈજાઓ પહોંચી હતી. આંખના નિષ્ણાત તબીબો દ્વારા તેમની તાકીદની સારવાર અને તપાસ હાથ ધરવામાં આવી છે. સિવિલ હોસ્પિટલના ટ્રોમા સેન્ટર અને શહેરના અલગ-અલગ ખાનગી દવાખાનાઓમાં દિવાળીની રાત્રે અને બીજા દિવસે મળીને કુલ 74 જેટલા કેસો સામે આવ્યા હતા.

ફટાકડાના કારણે વાયુ પ્રદૂષણમાં થયેલા અતિશય વધારાથી સામાન્ય નાગરિકો માટે પણ મુશ્કેલી ઊભી થઈ હતી. રાત્રિ દરમિયાન ફટાકડાના સતત ધુમાડા અને કેમિકલ ગંધને પગલે વાતાવરણમાં સ્મોગ જેવી સ્થિતિ સર્જાઈ હતી, જેના કારણે વૃદ્ધો, બાળકો તેમજ અસ્થમા અને એલર્જી ધરાવતા લોકોને શ્વાસ લેવામાં ગંભીર તકલીફનો સામનો કરવો પડ્યો હતો. તબીબોએ જણાવ્યું હતું કે તહેવારની ઉજવણીમાં સાવચેતીનો સદંતર અભાવ અને બાળકોને એકલા ફટાકડા ફોડવા દેવાની બેદરકારી આવા બનાવો પાછળનું મુખ્ય કારણ બની રહી છે