હરે કૃષ્ણ મહામંત્રના કિર્તન સાથે ઇસ્કોન મંદિર દ્વારા કાલે રથયાત્રા
નિજ મંદિરે વિશેષ મંગળા આરતી, શ્રૃંગાર દર્શન, ભગવાન જગન્નાથને પ૬ ભોગ અર્પણ, પ્રવચન, ભંડારો : ર૦ ફુટ લાંબા, ૧ર ફુટ પહોળા અને શિખર સાથે ર૦ ફુટ ઊંચા, ફુલોથી સુશોભિત તેમજ લાઇટોથી શણગારેલા રથમાં સાડા ત્રણ ફુટ લંબાઇ અને પહોળાઇના ભગવાન જગન્નાથજી, ભાઇ બલદેવજી અને બહેન સુભદ્રા નગરચર્યાએ નિકળશે, રથના પૈંડાં જ ૭ ફુટના છે : કાલે સાંજે પ વાગે કોટેચા ચોકથી રથયાત્રાનો પ્રારંભઃ ઇસ્કોન મંદિરે સમાપનઃ ભાવિકોને બુંદીના ૮૦ હજાર પેકેટનું વિતરણ
રાજકોટઃ આ રવિવારે ૦૭ જુલાઈ ના અષાઢી બીજના દિવસે ઇસ્કોન મંદિર દ્વારા દર વર્ષ ની માફક આ વર્ષે પણ ઇસ્કોન મંદિર રાજકોટ દ્વારા જગન્નાથ રથયાત્રા કાઢવામાં આવશે.
આ અંગે વધુ માહિતી આપતા ઇસ્કોન મંદિર રાજકોટ ના પ્રમુખ વૈષ્ણવસેવા પ્રભુજી જણાવે છે કે વામન પુરાણ માં જણાવાયું છે કે ‘‘જે કોઈ વ્યક્તિ ભગવાન જગન્નાથ ના રથ નું દોરડું ખેંચે છે અથવા દોરડા ને સ્પર્શ પણ કરે છે તો તેના જન્મો જન્મ ના પાપ નષ્ટ થાય છે. જે કોઈ પણ રથ પર બિરાજેલા ભગવાન શ્રી જગન્નાથ ના એક વાર પણ દર્શન કરે છે તેનો પુનર્જન્મ થતો નથી''. આ વર્ષે રથયાત્રા ની ઉજવણી ખૂબ જ ધામધૂમ થી અને હર્ષોઉલ્લાસ પૂર્વક ઉજવવામાં આવશે. ઉજવણી ની તૈયારી ના ભાગ રૂપે મંદિર ને આકર્ષક લાઈટ થી શણગારવામાં આવેલ છે. ભગવાન ના રથ ને ફૂલો ની લાર થી શણગારવામાં આવશે અને રાત્રે ભગવાન ના રથ પર દર્શન સારી રીતે થઇ શકે એ હેતુથી રથ ને વિશેષ લાઈટ દ્વારા રોશનીયુક્ત કરવામાં આવશે. રથયાત્રા જયારે શહેર ના રાજમાર્ગો પર થી પસાર થાય ત્યારે શહેરીજનો ને પ્રસાદ ના ભાગ રૂપે બુંદી નું વિતરણ કરવા માટે પાંચ હજાર બુંદી તૈયાર કરી આશરે ૮૦ હજાર પેકેટ નું વિતરણ શહેર ના રાજમાર્ગો પર રથના દર્શન કરતા દર્શનાર્થીઓ માં કરવામાં આવશે.
અષાઢી બીજ ના કાર્યક્રમ ની શરૂઆત સવારે ૪:૩૦ વાગે વિશેષ મંગળા આરતી થી કરવામાં આવશે. ૯ વાગે વિશેષ શ્રુંગાર દર્શન અને ૧૦ વાગે ભગવાન જગન્નાથ ને ૫૬ ભોગ અર્પણ કરવામાં આવશે. સવારે ૧૧ વાગે ઇસ્કોન મંદિર સિંગાપોરના પ્રમુખ દેવકીનંદન પ્રભુજી દ્વારા દ્વારા જગન્નાથ કથા પર પ્રવચન આપવામાં આવશે. રથયાત્રાની શરૂઆત સાંજે ૫ કલાકે રામકળપા ડેરી કોટેચા ચોક ખાતે થી શરુ થશે અને ઇન્દિરા સર્કલ, પંચાયત ચોક, આકાશવાણી ચોક, જે. કે. ચોક, પુષ્કરધામ ચોક થઇ કાલાવડ પર આવશે જ્યાં એજી ચોક, જ્ડ્ડુસ રેસ્ટોરન્ટ થી કટારીયા સર્કલ થઇ ઇસ્કોન મંદિર એ આવશે. ઉપરોક્ત દર્શાવેલ દરેક મુખ્ય ચોક પર ભગવાન જગન્નાથ ની આરતી કરવામાં આવશે. રથયાત્રા દરમિયાન સંપૂર્ણ માર્ગ માં હરે કળષ્ણ મહામંત્ર નું કીર્તન કરવામાં આવશે અને વાજતે ગાજતે અને નાચતે ભગવાન જગન્નાથ ને નગરચર્યા કરાવવામાં આવશે. રાત્રે ૮ વાગ્યાં થી મંદિર માં સૌ દર્શનાર્થીઓ ભંડારા પ્રસાદ શરુ થઇ જશે.
વધુ મા પ્રભુજી જણાવે છે કે રથયાત્રા દરમિયાન રથયાત્રા મા આવનાર ભક્તો ની સલામતી ની પણ વિશેષ તકેદારી રાખવામાં આવશે. રથયાત્રા દરમિયાન માર્ગ મા ટ્રાફિક વ્યવસ્થા જળવાઈ રહે તે હેતુથી સ્વયં સેવકો ની એક ટીમ બનાવવા મા આવી છે તદુપરાંત રથયાત્રા દરમિયાન રસ્તા મા આવતા ઇલેક્ટ્રિક વાયરો થી કોઈ અકસ્માત ના થાય તે હેતુ થી પીજીવીસીએલ ની ટીમ પણ રથયાત્રા ની સાથે તૈનાત રહે તે માટે પીજીવીસીએલ ને પણ વિનંતી કરવામાં આવેલ છે. પોલીસ પ્રશાશન માંથી પણ રથયાત્રા ની સલામતી જાળવવા માટે રથયાત્રા મા પોલીસ નો કાફલો પણ તૈનાત રહેશે. ધર્મપ્રેમીજનોને આમંત્રણ અપાયું છે.
(2:17 PM IST)
