રાજકોટ, તા.૮,

રાજકોટ શહેરની ભાગોળે ભાવનગર હાઇવે પર આવેલી ત્રંબા નજીક આર.કે.યુનિવર્સિટીમાં અભ્યાસ કરતા અમરેલી પંથકના ફાર્મસીના છાત્રએ હોસ્ટેલના રૂમમાં ગળેફાંસો ખાઇ આપઘાત કરી લીધો છે. ગત મોડી રાત્રે છાત્રો હોસ્ટેલમાં ગણેશ મહોત્સવની તૈયારી કરતા હતા. એ સમયે મૃતક યુવાને પોતાના રૂમમાં જઇ અગમ્ય કારણોસર જીવન ટૂંકાવી લીધું હતું. પોલીસે જરૂરી કાર્યવાહી કરી મૃતકની કોલ ડિટેલ્સના આધારે તપાસ હાથ ધરી છે.

જાણવા મળતી વિગત મુજબ, મૂળ અમરેલી પંથકનો અને હાલ આર.કે.યુનિવર્સિટીની હોસ્ટેલમાં પાંચમાં માળે રૂમમાં રહેતો અને ફાર્મસીના ત્રીજા વર્ષમાં અભ્યાસ કરતા છાત્રએ ગઇકાલે મોડી રાત્રે પોતાના રૂમમાં પંખા સાથે ચાદર બાંધી ગળેફાંસો ખાઇ આપઘાત કરી લીધો હતો. મૃતક તેના ગામડે ગયો હતો જ્યાંથી બે દિવસ પહેલા જ પરત આવ્યો હતો. શનિવારથી ગણેશ મહોત્સવ શરૂ થઇ રહ્યો હોવાથી ગત રાત્રે છાત્રો હોસ્ટેલના ગ્રાઉન્ડમાં ગણેશ મહોત્સવના પંડાલ શણગારવાની તૈયારી કરી રહ્યા હતા. દરમિયાન વિદ્યાર્થી કોઇને જાણ કર્યા વિના કે કોઇ વાત કહ્યા વિના હોસ્ટેલના પાંચમાં માળે જતો રહ્યો હતો. આ દરમિયાન આ વિદ્યાર્થીના રૂમની બાજુમાં  રહેતો તેનો મિત્ર બોલવવા ગયો હતો. ત્યારે દરવાજો અંદરથી બંધ હતા. વિદ્યાર્થીએ અવાજ કરવા છતાં અંદરથી કોઇ જવાબ ન મળતા તેણે જોર જોરથી ખટખટાવવા છતા તે દરવાજો ખૂલતો ન હતો. જેથી વિદ્યાર્થીએ નીચે જઇને હોસ્ટલેના ગૃહપતિને જાણ કરતા તેઓ દોડી આવ્યા હતા અને રૂમના વેન્ટીલેશનમાંથી જોતા વિદ્યાર્થી લટકતી હાલતમાં જોવા મળ્યો હતો.બનાવની જાણ થતા ૧૦૮નો સ્ટાફ દોડી ગયો હતો અને તેને મૃત જાહેર કરી આજીડેમ પોલીસને જાણ કરી હતી.  આથી પોલીસની ટીમે જરૂરી કાર્યવાહી કરી મૃતકના પરિવારને જાણ કરવામાં આવી હતી. પોલીસે મૃતકના મોબાઇલ કોલ ડિટેલ્સના આધારે મૃત્યુનું કારણ જાણવા વધુ તપાસ હાથ ધરી છે.