રાજકોટ તા. ૪: રાજકોટ સહિત રાજયભરના સસ્‍તા અનાજના દુકાનદારો ર૦ હજાર કમીશન તથા ૯૭ ટકા ફરજીયાત ઓનલાઇન મુદે ૧લી ઓકટોબરથી હડતાલ પર ઉતરી ગયા છે, આજે હડતાલનો ચોથો દિવસ છે, હજુ દુકાનદારો અને કાર્ડ હોલ્‍ડરો વચ્‍ચે માથાકુટ શરૂ થઇ નથી, પરંતુ આવતા અઠવાડિયાથી દેકારો વધશે. પુરવઠા નિગમના ગોડાઉનોમાં માલનો ભરાવો પણ થઇ ગયો છે.

દરમિયાન હડતાલ ચાલુ રહેતા ગાંધીનગરથી પુરવઠા સચીવે હડતાલ સામે અસરકારક પગલા લેવા, વિતરણ ન ખોરવાય તે જોવા સહિતના મુદાઓ અંગે આજે બપોર બાદ રાજયભરના ડીએસઓ સાથે વીસી યોજી છે, બીજી બાજુ રાજકોટ  DSO  દ્વારા પણ હડતાલ સામે નકકર કાર્યવાહી કરાઇ નથી, પોલીસી લેવલનો પ્રશ્‍ન છે તેમ તમામે અકળ મૌન સેવી લીધું છે.