ખોડલધામ મંદિરે તેજસ્વિતા સ્નેહમિલન સમારોહ યોજાઈ ગયો
શ્રી સરદાર પટેલ કલ્ચરલ ફાઉન્ડેશન દ્વારા વિવિધ પાંચ પ્રકલ્પો લોન્ચ કરાયાઃ તેજસ્વિતા સ્નેહમિલન સમારોહમાં કલેકટર પ્રભવ જોશી, પોલીસ કમિશનર બ્રજેશ ઝા, મ્યુ. કમિ. દેવાંગ દેસાઈની ઉપસ્થિતિ
રાજકોટઃ શ્રી ખોડલધામ ટ્રસ્ટ-કાગવડ દ્વારા સંચાલિત શ્રી સરદાર પટેલ કલ્ચરલ ફાઉન્ડેશન- રાજકોટ અને શ્રી ખોડલધામ વિદ્યાર્થી સમિતિ- રાજકોટ દ્વારા વર્ષોથી સર્વ સમાજના યુવાનો માટે સ્પર્ધાત્મક પરીક્ષાના તાલીમ વર્ગો રાજકોટ શહેરના શ્રી સરદાર પટેલ ભવન ખાતે ચાલી રહ્યા છે. જેમાં યુપીએસસી, જીપીએસસી, ઉપરાંત વર્ગ ૧, ૨ અને ૩ની સ્પર્ધાત્મક પરીક્ષાના તાલીમ વર્ગોમાંથી તાલીમ લઈને અનેક યુવાનો વિવિધ સરકારી વિભાગમાં -તિષ્ઠિત જગ્યા પર ફરજ બજાવી રહ્યા છે. સંસ્થામાંથી તાલીમ મેળવીને સરકારી નોકરી મેળવનારા તમામ તેજસ્વી અધઝિકારીઓ-કર્મચારીઓના સ્નેહમિલન સમારોહનું આયોજન શ્રી ખોડલધામ મંદિર-કાગવડ મુકામે કરવામાં આવ્યું હતું.
શ્રી ખોડલધામ ટ્રસ્ટ-કાગવડના ચેરમેનશ્રી નરેશભાઈ પટેલની ઉપસ્થિતિમાં યોજાયેલા આ સ્નેહમિલન સમારોહમાં શ્રી સરદાર પટેલ કલ્ચરલ ફાઉન્ડેશન- રાજકોટ દ્વારા વિવિધ પાંચ -કલ્પોનું લોન્ચિંગ કરવામાં આવ્યું હતું. તેજસ્વિતા સ્નેહમિલન સમારોહમાં ઉપસ્થિત રહેનાર તમામ સફળ વિદ્યાર્થીઓનું ટ્રસ્ટીશ્રીઓ દ્વારા મા ખોડલની છબી આપી, ખેસ પહેરાવીને ખોડલધામની માહિતી પુસ્તિકા આપીને સન્માન કરવામાં આવ્યું હતું. શ્રી સરદાર પટેલ કલ્ચરલ ફાઉન્ડેશન- રાજકોટના પ્રમુખશ્રી હરેશભાઈ પરસાણાએ સૌનું શાબ્દિક સ્વાગત કર્યું હતું. ત્યારબાદ જિલ્લા કલેક્ટરશ્રી પ્રભવ જોશી, પોલીસ કમિશનરશ્રી બ્રજેશ કુમાર ઝા અને મ્યુનિસિપલ કમિશનરશ્રી દેવાંગ દેસાઈનું ટ્રસ્ટીશ્રીઓ દ્વારા સન્માન કરાયું હતું. બાદમાં શ્રી સરદાર પટેલ કલ્ચરલ ફાઉન્ડેશન- રાજકોટના મંત્રીશ્રી જી.એલ. રામાણી દ્વારા સંસ્થાની કામગીરી વિશે માહિતી આપવામાં આવી હતી. ત્યારબાદ સ્નેહમિલન સમારોહમાં પધારેલા ક્લાસ-૧ અધિકારીઓનું સન્માન કરવામાં આવ્યું હતું.
આ કાર્યક્રમમાં શ્રી સરદાર પટેલ કલ્ચરલ ફાઉન્ડેશન- રાજકોટ દ્વારા વિવિધ ૫ પ્રકલ્પોનું લોન્ચિંગ કરવામાં આવ્યું હતું. જેમાં સૌપ્રથમ શ્રી સરદાર પટેલ કલ્ચરલ ફાઉન્ડેશનની નવી શાખા જે ગાંધીનગર ખાતે શરૂ થનાર છે તેનું લોન્ચિંગ કરાયું હતું. ત્યારબાદ યુપીએસસી - જીપીએસસીની જુનિયર ફાઉન્ડેશન કોર્ષની શરૂઆત થનાર છે તેનું લોન્ચિંગ કરાયું હતું. બાદમાં ગુજરાતમાં સૌ-થમ વખત જીપીએસસી પ્રિલિમ્સ માટે અંગ્રેજી માધ્યમમાં શરૂ થનાર ઓનલાઈન બેચનું લોન્ચિંગ કરવામાં આવ્યું હતું. ત્યારબાદ આઈઆઈટી/નીટની ફાઉન્ડેશન બેચનું લોન્ચિંગ કરવામાં આવ્યું હતું. પાંચમાં પ્રકલ્પ તરીકે શ્રી સરદાર પટેલ કલ્ચરલ ફાઉન્ડેશન ન્યૂઝ લેટર (ત્રિમાસિક)નું વિમોચન કરવામાં આવ્યું હતું.
શ્રી પ્રભવ જોશીએ પોતાના સંબોધનમાં જણાવ્યું હતું કે, હું જ્યારે આઠ વર્ષ પહેલા રાજકોટમાં આસિસ્ટન્ટ કલેક્ટર તરીકે આવ્યો હતો ત્યારથી મારે એસપીસીએફ સાથે નાતો છે. હું આ સંસ્થામાં લેક્ચર આપવા માટે જતો હતો. સંસ્થા દ્વારા જે પ્રકલ્પો શરૂ કરવામાં આવ્યા છે તે ખૂબ જ ઉપયોગી છે. આ ઉપરાંત તેમણે યુપીએસસી જેવી કઠિન પરીક્ષા પાસ કરવા માટે કેવી રણનીતિ અપનાવવી જોઈએ તે અંગે માર્ગદર્શન આપ્યું હતું.
શ્રી બ્રજેશ કુમાર ઝાએ લોકોને શિક્ષિત કરવા માટે અને યુવાનોને સારી જગ્યાએ નોકરી મળે તે માટે એસપીસીએફ સંસ્થા દ્વારા જે પ્રયાસો કરવામાં આવી રહ્યા છે તેને બિરદાવ્યા હતા. આ ઉપરાંત તેમણે સરકારી વિભાગોમાં વિવિધ જગ્યાઓ પર ફરજ બજાવી રહેલા અધિકારીઓ-કર્મચારીઓને જણાવ્યું હતું કે, તેમણે લોકોની સમસ્યા સાંભળવી જોઈએ. તમારી પાસે કામ લઈને આવનાર લોકો સંતુષ્ટ થઈને જાય તો તમારી સર્વિસ સાર્થક થઈ ગણાશે. નોકરી તો તમામ લોકો કરતાં હોય છે પરંતુ સમાજ અને દેશની સેવા કેવી રીતે કરવી તે મહત્વનું છે.
શ્રી દેવાંગ દેસાઈએ યુવાનોને કારકિર્દી નિર્માણ અંગે જરૂરી માર્ગદર્શન આપ્યું હતું. તેમણે જણાવ્યું હતું કે, સરકારી નોકરીમાં આપને જે ભૂમિકા મળી છે તેને સારી રીતે પૂર્ણ કરવી જોઈએ. શ્રી સરદાર પટેલ સાહેબની વાતને યાદ કરતાં તેમણે જણાવ્યું હતું કે, લોકો પ્રસંશા કરે કે ન કરે તમારે તમારી ભૂમિકા સારી રીતે નિભાવવાની છે. લોકો તમારી પાસે અપેક્ષા રાખે એ સારા તંત્રની નિશાની છે અને એ આશા આપણે પૂર્ણ કરવી જોઈએ.
શ્રી નરેશભાઈ પટેલે જણાવ્યું કે, શ્રી ખોડલધામ માત્ર મંદિર ન રહી જતાં શિક્ષણ અને આરોગ્યના કામ થાય તેની ચિંતા કરી છે. શ્રી ખોડલધામ ટ્રસ્ટ-કાગવડ દ્વારા રાજકોટ નજીક અદ્યતન કેન્સર હોસ્પિટલ અને રિસર્ચ સેન્ટરનું નિર્માણ થવા જઈ રહ્યું છે. જેમાં સૌરાષ્ટ્રના લોકોને ઘર આંગણે જ એક છત નીચે તમામ સારવાર આપવામાં આવશે. સાથે જ તેમણે સૌને નવા વર્ષની શુભકામના પાઠવી હતી.
કાર્યક્રમમાં શ્રી ખોડલધામ ટ્રસ્ટ-કાગવડ, શ્રી સરદાર પટેલ કલ્ચરલ ફાઉન્ડેશન- રાજકોટ, શ્રી લેઉવા પટેલ સમાજ અતિથિ ભવન- વેરાવળ સોમનાથના ટ્રસ્ટીશ્રીઓ, શ્રી ખોડલધામ ટ્રસ્ટ-કાગવડના કન્વીનરશ્રીઓ અને તેમની સંગઠન ટીમ, વિવિધ સમિતિઓના સભ્યો સહિત મોટી સંખ્યામાં લોકોએ હાજરી આપી હતી. તેમ ખોડલધામ ટ્રસ્ટ - કાગવડની યાદીમાં જણાવ્યુ છે.
(4:24 PM IST)
