રાજકોટ તા. રપઃ જૂની કલેકટર કચેરીમાં બેસતી પુરવઠાની ઝોનલ-૧ કચેરી સામે ફરી ફરિયાદોના ઢગલા શરૂ થયા છે, લોકોને ર થી ૩ દિવસથી ભારે ધકકા થઇ રહ્યાની વિગતો બહાર આવી છે.

આજે પણ સવારે ૧૦-૧૧ વાગ્‍યે ઝોનલ કચેરીના સ્‍ટાફ અને રેશનકાર્ડની કામગીરી કરવા આવનાર વચ્‍ચે ભારે શાબ્‍દિક ટપાટપી-બબાલ થઇ હતી, દરરોજ માત્ર ૩૦ ટોકન જ અપાતા હોય અનેક લોકોને ભારે ધરમધકકા થઇ રહ્યા છે, જેના પરિણામે આજે તો ભારે દેકારો મચી ગયો હતો, અધુરામાં પુરૂ ઝોનલ ઓફીસર દ્વારા રેશનકાર્ડની કામગીરી બપોરે ર વાગ્‍યે બંધ કરી દેવાની હોવાની વિગતો બહાર આવી હતી, આ તમામ બાબતે આજે કલેકટરને પણ ફરિયાદો થઇ હતી, પુરવઠાના જવાબદાર અધીકારીઓનું ધ્‍યાન દોરાયું હતું.

આ પછી જીલ્લા પુરવઠા તંત્રે ઝોનલ-૧ સહિત તમામ ઝોનલ કચેરીમાં પૂરતા પ્રમાણમાં ટોકન આપવા અને સાંજે ૬ સુધી રેશનકાર્ડ કામગીરી ચાલુ રાખવા આદેશો કરાયા હતા, આજે અરજદારોમાં પ્રચંડ રોષ પણ જોવા મળ્‍યો હતો.