રાજકોટ, 15 એપ્રિલ 2025: રાજકોટમાં ભૂઈ મા તરીકે ઓળખાતી એક મહિલાની ધતિંગ લીલાનો પર્દાફાશ થયો છે, જેમાં છેલ્લા 20 વર્ષથી લોકોના દુઃખ-દર્દ દૂર કરવાના નામે લૂંટ ચલાવવામાં આવી રહી હતી. જન વિજ્ઞાન જાથાએ 1267મા પર્દાફાશમાં જેતપુરના જેપુર ગામે દશામાનો મઢ ધરાવતી ભાવનાબેન ધીરુભાઈ મકવાણાને ઝડપી પાડી છે. એક પીડિતાએ જણાવ્યું કે, તેના સાસરિયાએ ઘરકંકાસ દૂર કરવાના નામે ભૂઈ માને બોલાવી હતી, પરંતુ વારંવારના ત્રાસથી કંટાળીને તેણે જાથાનો સંપર્ક કર્યો. પીડિતાએ આક્ષેપ કર્યો કે, અત્યાર સુધીમાં 60 હજાર રૂપિયાની લૂંટ થઈ ચૂકી છે, અને એક ભૂવા સાથે તેને સ્નાન પણ કરાવવામાં આવ્યું હતું, જે કાયદેસર રીતે ગુનો ગણાય છે.  

જન વિજ્ઞાન જાથાના જયંત પંડ્યાએ જણાવ્યું કે, જેતપુરના વીરપુર નજીક આવેલા જેપુર ગામમાં ભાવનાબેન મકવાણા છેલ્લા 20 વર્ષથી ભૂઈ મા તરીકે લોકોને છેતરી રહ્યા હતા. તેઓ દશામાના માતાજીનો મઢ ધરાવે છે અને લોકોને ભભૂતિ, અબીલ, ગુલાલ અને કંકુ આપીને ઉપચારના નામે પૈસા ખંખેરતા હતા. આ ઘટનામાં ભૂઈ માએ એક પીડિતા પાસેથી વિધિ માટે રૂ. 5,000 અને આવવા-જવાના રૂ. 2,000 એમ કુલ રૂ. 7,000 વસૂલ્યા હતા. પીડિતા રાધિકાએ જણાવ્યું, "મારા પ્રેમ લગ્નને એક વર્ષ થયું છે, અને ત્યારથી સાસરિયાએ મને ચાર ભૂવા-ભૂઈ મા પાસે લઈ જઈને ત્રાસ આપ્યો છે. એક ભૂવા સાથે મને રાત્રે 10 વાગે મોરબી રોડ પર તેના ઘરે લઈ જઈને સ્નાન કરાવ્યું હતું. મને કહેવામાં આવ્યું કે હું સાસરિયાને હેરાન કરું છું અને મારું અગાઉનું માગું મને નડે છે."  

પીડિતાએ રડતાં-રડતાં વધુમાં જણાવ્યું, "મને ચાંદલા કરવામાં આવ્યા, હાર પહેરાવવામાં આવ્યા અને ભભૂતિ પીવડાવવામાં આવી. ઘરમાં ઝઘડા બંધ થાય તે માટે હું રાત્રે 8 વાગે નાના બાળક સાથે દશમ ભરવા જતી હતી અને મધ્યરાત્રે 12 વાગે પરત ફરતી હતી. અત્યાર સુધીમાં મારા સાસરિયાએ 60 હજાર રૂપિયા ખર્ચી દીધા, જે વ્યાજે લીધેલા હતા અને તેનું વ્યાજ પણ હું ભરું છું. હું ઘરકામ અને પાર્લરમાં કામ કરું છું, તો આટલા પૈસા હું ક્યાંથી લાવું?"  

જન વિજ્ઞાન જાથાની ટીમે આ ઘટનાની માહિતી મળતાં તાત્કાલિક કાર્યવાહી કરી અને માલવિયા નગર પોલીસ સ્ટેશનની હાજરીમાં ભૂઈ માનો પર્દાફાશ કર્યો. ભાવનાબેન મકવાણાએ પોલીસ અને જાથા સમક્ષ ખાતરી આપી કે તેઓ આ ધતિંગ લીલા બંધ કરશે. તેમના પતિ ધીરુભાઈ કાળાભાઈ મકવાણાએ પણ કબૂલ્યું કે, તે ભૂઈ માને માતાજી આવે ત્યારે પગે લાગતો હતો. ભાવનાબેને પોતાનો બચાવ કરતાં કહ્યું, "મેં દશામાને તેડાવ્યા હતા, એટલે હું અહીં આવી હતી. હું દાણા જોતી નથી, ભભૂતિ પાઈએ તો બધું સારું થઈ જાય છે. તમે ભણેલા છો, એટલે તમને ખબર નહીં પડે."  

જયંત પંડ્યાએ વધુમાં જણાવ્યું, "આવી ધતિંગ લીલાઓ લોકોની લાગણીઓ સાથે રમત રમે છે. પીડિતાને અત્યાર સુધીમાં પાંચ ભૂવા-ભૂઈ મા દ્વારા ત્રાસ આપવામાં આવ્યો છે, જેમાં એક ભૂવા સાથે સ્નાન કરાવવું એ ગંભીર ગુનો છે. આવા કૃત્યો સામે કડક કાર્યવાહી થવી જોઈએ." આ ઘટનાએ રાજકોટમાં ભૂવા-ભૂઈ માના નામે ચાલતી લૂંટની પ્રથા સામે ફરી એકવાર ચેતવણી આપી છે, અને લોકોને આવી અંધશ્રદ્ધાઓથી દૂર રહેવા અપીલ કરવામાં આવી છે.