રાજકોટઃ ગોંડલ બાયપાસ ચોકડી ઓવરબ્રીજ નીચે ૧૫૦ રીંગ રોડ પર રોજબરોજ ટ્રાફિકજામ થતો હોવાની અહિથી નિયમીત પસાર થતાં વાહનચાલકોમાં ફરિયાદો ઉઠી છે. લોકોમાં ઉઠેલી ફરિયાદ મુજબ અહિ રોડ પર જ અમુક રિક્ષાચાલકો આડેધડ પોતાની રિક્ષા ઉભી રાખી દઇ મુસાફરોને બોલાવે છે. મુસાફરો બેસી ન જાય અને રિક્ષા ઉપડી ન જાય ત્‍યાં સુધી તેઓ આડેધડ રોડ વચ્‍ચે જ રિક્ષા ઉભી રાખે છે. આ કારણે બીજા નાના-મોટા વાહનો અટવાઇ જાય છે. નજીકમાં જ ટ્રાકિફ પોલીસની ચોકી છે પરંતુ જે બધાને નજરે ચડે છે તે કદાચ ત્‍યાંના સ્‍ટાફને નહિ દેખાતુ હોય? તેવો સવાલ લોકો કરી રહ્યા છે. ચાર-પાંચ વોર્ડન અહિ ફરજ પર હોય છે. તેઓ ટ્રાફિક નિયમનની જવાબદારી સારી રીતે નિભાવતાં હોય છે. સાથે સાથે તેમણે આ રીતે આડેધડ રિક્ષા ઉભી રાખનારાઓને સાઇડમાં ઉભા રહેવા અને મુસાફરો શોધવા સમજાવવા જોઇએ જેથી કરીને બીજા વાહનચાલકોને હેરાન ન થવું પડે તેવું આ રસ્‍તેથી રોજબરોજ પસાર થનારા રાહદારીઓ, વાહનચાલકોનું કહેવું  છે. (ફોટોઃ અશોક બગથરીયા)