રાજકોટ, તા. ૩૦ જૂન, ૨૦૨૫: સુરેન્દ્રનગરમાં આજે એન્ટી કરપ્શન બ્યુરો (ACB) દ્વારા એક સફળ ટ્રેપ ગોઠવી ભ્રષ્ટ અધિકારી અને તેના સાથીદારને લાંચ લેતા રંગે હાથે ઝડપી પાડવામાં આવ્યા છે. વઢવાણ તાલુકાના વડોદ ગામે આવેલા બે પ્લોટના ગામ નમૂના નંબર-૨ના ઉતારા કઢાવવા માટે રૂ. ૩,૦૦૦ની લાંચ માંગવામાં આવી હતી, જે જાગૃત નાગરિકની ફરિયાદને આધારે ACBએ પકડી પાડી છે.
શું હતો બનાવ?
આ કામના ફરિયાદી, એક જાગૃત નાગરિક, ના વઢવાણ તાલુકાના વડોદ ગામે બે પ્લોટ આવેલા છે. આ બંને પ્લોટના ગામ નમૂના નંબર-૨નો ઉતારો મેળવવા માટે ફરિયાદીએ લખતર ગ્રામ પંચાયતના તલાટી-કમ-મંત્રી, વર્ગ-૩ના ધર્મેશકુમાર તળશીભાઈ પેઢડીયા (આરોપી નંબર-૧) નો સંપર્ક કર્યો હતો.
તલાટી ધર્મેશ પેઢડીયાએ ફરિયાદી પાસે રાજુભાઈ રામજીભાઈ વસોયા (આરોપી નંબર-૨, પ્રજાજન) મારફતે રૂ. ૩,૦૦૦નો વહીવટ કરવો પડશે તેમ કહી ગેરકાયદેસર લાંચની માંગણી કરી હતી અને આ રકમ રાજુભાઈને આપી દેવાનું જણાવ્યું હતું. ફરિયાદી આ ગેરકાયદેસર લાંચની રકમ આપવા માંગતા ન હોવાથી, તેમણે સુરેન્દ્રનગર ACBનો સંપર્ક કર્યો અને સમગ્ર મામલે ફરિયાદ દાખલ કરી હતી.
ACBનો સફળ છટકું:
ફરિયાદીની ફરિયાદના આધારે, ACB દ્વારા લાંચનું છટકું ગોઠવવામાં આવ્યું હતું. તા. ૩૦/૦૬/૨૦૨૫ના રોજ સુરેન્દ્રનગર ખાતે સુરજ પેઇન્ટર નામની દુકાન પાસે, એચ.પી. પેટ્રોલ પંપની સામે, રાજ હોટલ પાસે ગોઠવાયેલા આ છટકા દરમિયાન, આરોપી નંબર-૨ રાજુભાઈ વસોયાએ ફરિયાદી સાથે હેતુલક્ષી વાતચીત કરી અને ગેરકાયદેસર લાંચના રૂ. ૩,૦૦૦ રોકડા સ્વીકારી લીધા.
લાંચ સ્વીકારતા જ ACBની ટીમે બંને આરોપીઓને રંગે હાથે ઝડપી પાડ્યા હતા. આ કામના આરોપી નંબર-૧ ધર્મેશકુમાર પેઢડીયા અને આરોપી નંબર-૨ રાજુભાઈ વસોયાએ એકબીજાને મદદગારી કરી, લાંચનો ગુનો આચર્યો હતો. ACBએ લાંચની રકમ રૂ. ૩,૦૦૦ સ્થળ પરથી રીકવર કરી બંનેની ધરપકડ કરી કાયદેસરની કાર્યવાહી હાથ ધરી છે.
કાર્યવાહી કરનાર ટીમ:
આ સફળ ટ્રેપની કામગીરી પોલીસ ઇન્સ્પેક્ટર એમ.ડી.પટેલ, ACB પોલીસ સ્ટેશન, સુરેન્દ્રનગર અને તેમના સ્ટાફ દ્વારા કરવામાં આવી હતી. આ સમગ્ર ઓપરેશનનું સુપરવિઝન ઈ.ચા. મદદનીશ નિયામક કે.એચ.ગોહિલ, ACB રાજકોટ એકમ, રાજકોટ દ્વારા કરવામાં આવ્યું હતું. આ કાર્યવાહીથી ભ્રષ્ટાચાર આચરનારાઓમાં ફફડાટ વ્યાપી ગયો છે અને સરકારી કામોમાં પારદર્શિતા જાળવવા માટે ACBની સક્રિયતા પ્રશંસનીય બની રહી છે.