હેલ્મેટ કાયદાના અમલ અંગે ગોવિંદભાઈ પટેલ જનતાનો અવાજ બની આગળ આવ્યાઃ શહેરી વિસ્તારોમાં મુક્તિની માંગ
ઝડપી ડ્રાઈવિંગ કરતા અથવા રીલ્સ બનાવતા લોકોના અકસ્માતોને કારણે તમામ ટુ-વ્હીલર ચાલકોને સજા મળવી ન જોઈએ
રાજકોટઃ ગુજરાત હાઈકોર્ટ દ્વારા હેલ્મેટ કાયદાને સખત અમલમાં લાવવા માટે તા. ૮ સપ્ટેમ્બર ૨૦૨૫થી આદેશ કરવામાં આવ્યો છે. આ કાયદાના અમલ અંગે પૂર્વ ધારાસભ્ય અને પૂર્વ કેબિનેટ મંત્રી ગોવિંદભાઈ પટેલે મુખ્યમંત્રી ભુપેન્દ્રભાઈ પટેલને પત્ર લખીને શહેરી વિસ્તારોમાં મુક્તિની માંગ કરી છે. તેમણે આ પત્રમાં કાયદાના અમલમાં આવતી મુશ્કેલીઓનો ઉલ્લેખ કર્યો છે અને હાઈકોર્ટમાં આ અંગે રાહત મેળવવાની વિનંતી કરી છે.
પત્રમાં ગોવિંદભાઈ પટેલે જણાવ્યું છે કે, હાઈકોર્ટનો આ આદેશ માનવ જીવનને અકસ્માતમાં મૃત્યુથી બચાવવા માટે આવકારદાયક છે. તેઓએ અખબારોમાં પ્રકાશિત આંકડાઓનો ઉલ્લેખ કરીને કહ્યું કે, ટુ-વ્હીલર અકસ્માતમાં હેમરેજને કારણે થતા મૃત્યુને અટકાવવા માટે આ કાયદો જરૂરી છે. જોકે, તેઓએ શહેરી વિસ્તારોમાં તેના અમલમાં આવતી વ્યવહારિક મુશ્કેલીઓ તરફ પણ ધ્યાન દોર્યું છે.
તેઓના મતે, શહેરી વિસ્તારોમાં ટ્રાફિકને કારણે વાહનો ૧૫થી ૨૦ કિ.મી. પ્રતિ કલાકની ઝડપથી વધુ ચાલી શકતા નથી, જેથી અકસ્માતમાં હેમરેજ જેવી ગંભીર ઈજાની શક્યતા ઓછી છે. વધુમાં, કુટુંબ સાથે બજારમાં ખરીદી કરવા જતા લોકો માટે હેલ્મેટ વહન કરવું અસુવિધાજનક છે. પિતા, પત્ની અને એક-બે બાળકો સાથે બજારમાં જતા હોય ત્યારે વાહન પાર્ક કરીને ૫૦થી ૩૦૦ મીટર ચાલીને જવું પડે છે. આ સમયે બાળકોને સંભાળવા, હેલ્મેટને સુરક્ષિત રાખવા અને શોપિંગ કરવું ખૂબ મુશ્કેલ બને છે, એમ તેઓએ પત્રમાં લખ્યું છે.
ગોવિંદભાઈએ વધુમાં કહ્યું કે, ઝડપી ડ્રાઈવિંગ કરતા અથવા રીલ્સ બનાવતા લોકોના અકસ્માતોને કારણે તમામ ટુ-વ્હીલર ચાલકોને સજા મળવી ન જોઈએ. તેઓએ સૂચવ્યું કે, શહેરી વિસ્તારોમાં આ કાયદામાંથી મુક્તિ મેળવવા માટે હાઈકોર્ટમાં અરજી કરવી જોઈએ, જ્યારે હાઈવે પર તેનો કડક અમલ કરવો જરૂરી છે. તેઓએ આ અંગે કાનૂની પગલાં લેવા મુખ્યમંત્રીને વિનંતી કરી છે. આ પત્રની નકલ ગુજરાત સરકારના ગૃહમંત્રીને પણ મોકલવામાં આવી છે. સરકાર તરફથી હજુ સુધી કોઈ પ્રતિસાદ મળ્યો નથી. આ મુદ્દે વાહન ચાલકો અને નિષ્ણાતો વચ્ચે ચર્ચા શરૂ થઈ છે, જેમાં સુરક્ષા અને વ્યવહારિકતા વચ્ચે સંતુલનની જરૂરિયાત પર ભાર મૂકવામાં આવી રહ્યો છે.(૩૮.૩૦)
(3:50 PM IST)
