રાજકોટ : નવરાત્રીના તહેવારને અનુલક્ષીને રાજકોટ શહેર પોલીસ કમિશનરેટ વિસ્તારમાં કાયદો અને વ્યવસ્થા જાળવવા માટે એક મહત્વપૂર્ણ હુકમ જારી કરવામાં આવ્યો છે. પોલીસ કમિશનર બ્રજેશકુમાર ઝા દ્વારા બહાર પાડવામાં આવેલા આ હુકમ મુજબ, તા.૨૨ સપ્ટેમ્બરથી તા.૨ ઓક્ટોબર સુધી રાત્રિના બાર વાગ્યા બાદ કોઈ પણ ખાનગી કે જાહેર સ્થળે યોજાતા રાસ-ગરબા કે કાર્યક્રમોમાં માઇક તથા લાઉડ સ્પીકરનો ઉપયોગ કરી શકાશે નહીં.
આ હુકમ 'નોઇસ પોલ્યુશન (રેગ્યુલેશન એન્ડ કંટ્રોલ) રુલ્સ ૨૦૦૦'ની કલમ ૫(૩) અને ૬ની જોગવાઈઓ તેમજ ગુજરાત સરકારના વન અને પર્યાવરણ વિભાગના જાહેરનામાને આધારે જારી કરવામાં આવ્યો છે. આ નિયમો અનુસાર, નવરાત્રીના સમયગાળા દરમિયાન રાત્રિના દસ વાગ્યાથી બાર વાગ્યા સુધી જ માઇક અને લાઉડ સ્પીકરનો ઉપયોગ કરવાની મંજૂરી છે. નવરાત્રી તથા દશેરાના દિવસે પણ રાત્રિના ૧૨ વાગ્યા બાદ આ નિયમનું પાલન ફરજિયાત રહેશે.
જે વ્યક્તિ આ હુકમનો ભંગ કરશે, તે કાયદાકીય રીતે શિક્ષાને પાત્ર બનશે. આ પગલાનો મુખ્ય ઉદ્દેશ તહેવારોની ઉજવણી દરમિયાન ધ્વનિ પ્રદૂષણ પર નિયંત્રણ રાખીને શાંતિપૂર્ણ વાતાવરણ જાળવવાનો છે.