રાજકોટ : શહેરના રૈયા રોડ પર હનુમાન મઢી પાસે આવેલ રંગઉપવન સોસાયટીમાં રગનાથ મહાદેવના પટ્ટાંગણમાં રંગ ઉપવન ગરબી મંડળ દ્વારા છેલ્લા ૨૦થી વધુ વર્ષથી પ્રાચીન ગરબીનું આયોજન કરવામાં આવે છે. આ ગરબીમાં સોસાયટીની કારોબારીના મહિલા સભ્યોના માર્ગદર્શન હેઠળ તૈયાર કરવામાં આવેલ દાંડિયા રાસ, તાલી રાસ, દીવડા રાસ, ટિપ્પણી રાસ તથા બોધેણી સહિતના અવનવા રાસ ઓડીયોના તાલે ૨૫ થી વધુ બાળાઓ તથા બાળકો દ્વારા રજૂ કરવામાં આવે છે. ગરબીમાં બાળકો તથા બાળાઓને ડ્રેસ ગરબી તરફથી આપવામાં આવ્યો છે. આ ઉપરાંત બાળાઓ અને બાળકોને દરરોજ લ્હાણી અને નાસ્તો આપવામાં આવે છે. આ આયોજનને સફળ બનાવવા સોસાયટીની કારોબારી સમિતિના ભાઈઓ અને બહેનો તથા સોસાયટીના યુવાનો દ્વારા જહેમત ઉઠાવવામાં આવી રહી છે. (તસ્વીર : સંદીપ બગથરિયા)