૩ વર્ષના ટાબરીયાથી લઈ ૩૦ વર્ષના યુવાન હોર્સ રાઈડીંગ કરશે
રાજકોટમાં શનિ-રવિ ‘હાલાર એન્ડયુરન્સ અને વિન્ટર ગેમ્સ ૨૦૨૬': કાઠિયાવાડની અશ્વસંસ્કૃતિ, શિસ્ત અને માનવ-ઘોડા વચ્ચેના વિશ્વાસની એક જીવંત અભિવ્યક્તિ રજૂ થશે : ૨૦, ૪૦ અને ૬૦ કિ.મી.ની ઘોડેસવારી સ્પર્ધા, કાઠયાવાડી અશ્વો ભાગ લેશેઃ હાલાર ક્લબ દ્વારા સતત પાંચમાં વર્ષે આયોજન
રાજકોટઃ હાલાર ક્લબ દ્વારા હાલાર એન્ડયુરસ અને વિન્ટર ગેમ્સનું આયોજન કરવામાં આવેલ છે. જેમાં ત્રણ વર્ષથી લઈ ૩૦ વર્ષ સુધીના યુવાનો હોર્ષ રાઈડીંગ સ્પર્ધામાં ભાગ લેશે. હાલાર એન્ડયુરન્સ ૨૦૨૬માં સહનશક્તિ, સંસ્કૃતિ અને સંયમની ઉજવણી થશે તેમ સંસ્થાના આગેવાનોએ જણાવ્યું હતું.
હાલાર ક્લબના આગેવાનોએ જણાવેલ કે રાજકોટ એક વખત ફરી પોતાની ગાઢ અશ્વ પરંપરાને જીવંત કરવાની તૈયારીમાં છે. ૧૦ અને ૧૧ જાન્યુઆરીએ યોજાનાર હાલાર એન્ડયુરન્સ ૨૦૨૬ માત્ર એક રમતોત્સવ નથી, પરંતુ કાઠિયાવાડની અશ્વસંસ્કૃતિ, શિસ્ત અને માનવઘોડા વચ્ચેના વિશ્વાસની એક જીવંત અભિવ્યક્તિ છે.
હાલાર ક્લબ દ્વારા આયોજિત આ એન્ડ્ર્યુરન્સ રાઈડની પાંચમી આવૃત્તિ પરંપરા અને આધુનિક એન્ડ્ર્યુરન્સ રાઈડિગના સંતુલનનું પ્રતિબિબ છે. સમય સાથે આ આયોજન રાજકોટની ઓળખનો એક મહત્વપૂર્ણ ભાગ બની ગયું છે, જ્યાં વિવિધ વિસ્તારોમાંથી આવેલા સવારો, પરિવારજનો અને અશ્વપ્રેમીઓ એકસાથે જોડાય છે.
શનિવાર, ૧૦ જાન્યુઆરીએ કાર્યક્રમની શરૂઆત સવારો દ્વારા ઘોડા સાથે રિપોર્ટિગથી થશે. ત્યારબાદ નોંધણી અને ફરજિયાત પૂર્વ પશુચિકિત્સા તપાસ યોજાશે, જે આ આયોજનની જવાબદાર અશ્વસંભાળ પ્રત્યેની પ્રતિબદ્ધતા દર્શાવે છે. બપોરના સમયે એન્ડ્યુરન્સ માર્ગની મુલાકાત અને સવારો માટે માર્ગદર્શન બેઠક યોજાશે. સાંજ પડતા વિન્ટર ગેમ્સનું આયોજન કરવામાં આવશે, જેમાં બેરલ રેસ, ટેન્ટ પેગિંગ તેમજ જુનિયર વર્ગ માટે બોલ એન્ડ બકેટ અને હેટ રેસ જેવી રમતો યોજાશે. દિવસનું સમાપન પુરસ્કાર વિતરણ અને સહભોજન સાથે થશે, જે કાર્યક્રમને ઉત્સવી અને સૌહાર્દપૂર્ણ માહોલ આપે છે.
રવિવાર, ૧૧ જાન્યુઆરીએ વહેલી સવારથી મુખ્ય એન્ડયુરન્સ રાઈડનો આરંભ થશે. ૨૦ કિ.મી. અને ૪૦ કિ.મી.ની કેટેગરી ધરાવતી આ રાઈડ ઝડપની સ્પર્ધા નહીં પરંતુ સહનશક્તિ, યોગ્ય ગતિ, શિસ્ત અને સવાર તથા ઘોડા વચ્ચેના પરસ્પર વિશ્વાસની કસોટી છે. રાજકોટની આસપાસના કુદરતી અને લ્લશ્યમય માર્ગો પર યોજાતી આ રાઈડ દરમિયાન નિયમિત પશુચિકિત્સા તપાસ દ્વારા ઘોડાઓના આરોગ્ય અને સુખાકારીને કેન્દ્રસ્થાને રાખવામાં આવશે. બપોરે ભોજન અને ત્યારબાદ પુરસ્કાર વિતરણ સાથે કાર્યક્રમ પૂર્ણ થશે.
હાલાર એન્ડ્યુરન્સનું વિશેષ મહત્વ એ છે કે તે આંતરરાષ્ટ્રીય એન્ડ્યુરન્સ ફોર્મેટનું પાલન કરતા હોવા છતાં દેશી અશ્વ જાતિઓ સાથે ગાઢ રીતે જોડાયેલું છે. કાઠિયાવાડી, મારવાડી અને સિધિ જેવી જાતિઓની સહનશક્તિ, સૌંદર્ય અને મજબૂતીને આ આયોજન એક મહત્વપૂર્ણ મંચ પૂરો પાડે છે.
૨૦૨૧થી શરૂ થયેલી આ પહેલ આજે એક એવી ઉજવણી બની છે, જ્યાં રમત, વારસો અને જવાબદારી એકસાથે ચાલે છે. હાલાર એડ્યુરન્સ માત્ર એક સ્પર્ધા નહીં, પરંતુ ઘોડા અને માનવ વચ્ચેના અતૂટ સંબંધ, સંયમ અને ધીરજની ઉજવણી થશે. આ જાન્યુઆરીમાં જ્યારે રાજકોટના માર્ગો પર ફરી એકવાર ખૂરના તાલ ગુંજશે, ત્યારે હાલાર એન્ડ્યુરન્સ ૨૦૨૬ એ સંદેશ આપશે કે સાચી સહનશક્તિ માત્ર દોડમાં નહીં, પરંતુ દરેક પગલામાં, દરેક સફરમાં અને દરેક જોડાણમાં જીવંત રહે છે. તેમ ક્લબના આગેવાનોએ અંતમાં જણાવેલ.
તસ્વીરમાં અકિલાના મોભી શ્રી કિરીટભાઈ ગણાત્રાએ સર્વશ્રી મયુરસિંહ ઝાલા, યશદીપસિંહ જાડેજા, ભાગ્યરથીસંહ ગોહિલ, શિવદત્તસિંહ જાડેજા અને જ્યોતિરાત્યાસંહ વાઘેલા નજરે પડે છે. (તસ્વીરઃ અશોક બગથરીયા)
સ્થળ
હાલાર ક્લબ
ઈશ્વરીયા-અમરેલી રોડ, રેડવૂડ ઈન્ડસ્ટ્રીઝની પાછળ, રાજકોટ.
મો.૮૧૫૪૦ ૯૬૭૯૭
(3:19 PM IST)
