તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
રોકાણ પર નફાના બહાને રાજદિપસિંહની નવી દિલ્હીની યુવતિ સાથે રૂા. ૧૨.૫૦ લાખની ઠગાઇઃ માથે જતાં ધમકી
સાધુ વાસવાણી રોડ પર રહેતાં ઓનલાઇન જોબ આપવાનું કામ કરતાં દામીની પ્રજાપતિની ફરિયાદ પરથી યુનિવર્સિટી પોલીસે શીતલ પાર્ક પાસે ધ સ્પાયરમાં જાડેજા બ્રધર્સ ઇન્વેસ્ટમેન્ટ નામે ઓફિસ ધરાવતાં રાજદિપસિંહ સામે ગુનો નોંધ્યો
રાજકોટ તા. ૧૫: રાજકોટ તા. ૧૫: શહેરના સાધુ વાસવાણી રોડ વિસ્તારમાં રહેતી અને ઓનલાઈન જોબ કન્સલ્ટન્સી ચલાવતી મુળ નવી દિલ્હીની ૨૮ વર્ષીય યુવતી સાથે વિશ્વાસઘાત અને છેતરપિંડીની ઘટના બની છે. ૧૫૦ ફૂટ રિંગ રોડ પર ઇન્વેસ્ટમેન્ટ ઓફિસ ધરાવતા શખ્સે રોકાણ પર નફાની લાલચ આપી કુલ ૧૨.૫૦ લાખ પડાવી લીધા બાદ રકમ પરત માંગતા યુવતીને ગંદી ગાળો આપી જાનથી મારી નાખવાની ધમકી આપતા પોલીસ ફરિયાદ નોંધાઈ છે.ે
આ બનાવમાં યુનિવર્સિટી પોલીસે મુળ નવી દિલ્હી શિવ વિહારના અને હાલ સાધુ વાસવાણી રોડ પર યોગીનગર કોમ્પલેક્ષ બીજા માળે રહેતાં દામીનીબેન રાજેન્દ્રકુમાર પ્રજાપતિ (ઉ.વ.૨૮)ની ફરિયાદ પરથી સાધુ વાસવાણી રોડ સરીતા શેરી નં. ૫ કેશવી સુપર માર્કેટ પાસે સુર્યકૃપા ખાતે રહેતાં રાજદિપસિંહ ભરતસિંહ જાડેજા વિરૂધ્ધ ગુનો નોંધ્યો છે.
દામિનીબેને ફરિયાદમાં જણાવ્યું છે કે તે પોતાના ભાઇ સાથે રાજકોટ રહે છે અને સક્સેસ કિંગડમ નામે પ્રોપરાઈટરશીપ ફર્મ ચલાવે છે અને ઓનલાઈન જોબ અપાવવાનું કામકાજ કરે છે. તેઓ છેલ્લા બે વર્ષથી રાજદીપસિંહ ભરતસિંહ જાડેજાના સંપર્કમાં હતા. જુલાઈ ૨૦૨૪માં દામિનીબેને રાજદીપસિંહની ૧૫૦ ફૂટ રિંગ રોડ પર શીતલ પાર્ક પાસે ધ સ્પાયર બિલ્ડિંગમાં આવેલી જાડેજા બ્રધર્સ ઇન્વેસ્ટમેન્ટ ઓફિસ નં. ૧૩૩૦ ખાતે રોકાણ માટે ગયા હતાં. વિશ્વાસમાં આવીને તેમણે પ્રથમ વખત ૨,૫૦,૦૦૦ રૂપિયાનું રોકાણ કર્યું હતું. ત્યારબાદ ગત તા. ૦૧/૦૭/૨૦૨૫ના રોજ તે જ ઓફિસે ફરી ૧૦,૦૦,૦૦૦ રૂપિયાનું મોટું રોકાણ કર્યું હતું. આમ કુલ ૧૨,૫૦,૦૦૦ રૂપિયા રાજદીપસિંહને સોંપવામાં આવ્યા હતા.
રોકાણ કર્યા બાદ શરૂઆતના ત્રણ મહિના સુધી રાજદીપસિંહે કરાર મુજબ નફો આપ્યો હતો. પરંતુ ત્યારબાદ નફો કે મુળ રકમ આપવાનું બંધ કરી દીધું હતું. દામિનીબેને અનેકવાર ફોન કર્યા અને ઓફિસે ધક્કા ખાધા પરંતુ રાજદીપસિંહે સંતોષકારક જવાબ આપ્યો નહોતો. ગત તા. ૦૭/૦૧/૨૦૨૬ ના રોજ જ્યારે દામિનીબેન તેમના ભાઈ પ્રિન્સ સાથે ઓફિસે ગયા ત્યારે જાણવા મળ્યું કે રાજદીપસિંહે ઓફિસ બંધ કરી દીધી છે અને ત્યાંથી ગાયબ થઈ ગયેલ છે. ઓફિસ બંધ હોવાથી દામિનીબેન અને તેમના ભાઈ પ્રિન્સ સાંજે સાતેક વાગ્યે રાજદીપસિંહના ઘરે સાધુ વાસવાણી રોડ ખાતે પહોંચ્યા હતા. દામિનીબેને પોતાની રકમ પરત માંગતા રાજદીપસિંહે ઉશ્કેરાઈ અભદ્ર ગાળો દીધી હતી અને ધમકી પણ દીધી હતી કે-ં તારા પૈસા હવે પાછા નહીં મળે અને જો ફરીથી પૈસા માંગ્યા કે રાજકોટમાં કયાંય દેખાઈશ તો તને જાનથી મારી નાખીશ. યુનિવર્સિટી પીઆઇ એચ. એન. પટેલની રાહબરીમાં એએસઆઇ જે. એલ. બાળાએ ગુનો નોંધી તપાસ હાથ ધરી છે.
(2:16 PM IST)
