રાજકોટ, તા. 15 જાન્યુઆરી : પશ્ચિમ રેલ્વેના રાજકોટ ડિવિઝન દ્વારા મુસાફરોની સુવિધામાં વધારો કરવા અને સ્ટેશન ઇન્ફ્રાસ્ટ્રક્ચરના આધુનિકીકરણની દિશામાં એક અત્યંત મહત્વપૂર્ણ કદમ ઉઠાવવામાં આવ્યું છે. રાજકોટ રેલ્વે સ્ટેશન પર હવે 'સ્માર્ટ ડિજિટલ લોકર' સુવિધા કાર્યરત કરવામાં આવી છે. આ નવી સુવિધા દ્વારા મુસાફરો હવે રેલ્વેના કોઈપણ કર્મચારીની મદદ વગર સ્વયં સંચાલિત રીતે પોતાનો સામાન સુરક્ષિત રીતે મૂકી શકશે અને મેળવી શકશે.
રેલ્વે સ્ટાફ વગર સ્વયં સંચાલનની સુવિધા:
રાજકોટ સ્ટેશનના પ્લેટફોર્મ નંબર 1 પર અપર ક્લાસ વેઇટિંગ હોલની નજીક આ ડિજિટલ લોકર સ્થાપિત કરવામાં આવ્યા છે. પરંપરાગત ક્લોક રૂમ પ્રણાલી કરતા આ સિસ્ટમ તદ્દન અલગ અને આધુનિક છે. આ લોકર OTP (વન ટાઈમ પાસવર્ડ) અને QR કોડ આધારિત એક્સેસ પર કાર્ય કરે છે, જેનાથી સામાનની સુરક્ષામાં અનેકગણો વધારો થાય છે. આ સંપૂર્ણ પ્રક્રિયા ઝડપી, પારદર્શક અને યુઝર-ફ્રેન્ડલી છે. ખાસ વાત એ છે કે અહીં તમામ ચુકવણી ડિજિટલ અને કેશલેસ માધ્યમથી કરવામાં આવે છે, જેથી મુસાફરોને રોકડ વ્યવહારની જરૂર પડતી નથી.
પ્રવાસીઓ માટે આશીર્વાદરૂપ પહેલ:
આ નવી સુવિધા ખાસ કરીને એવા પ્રવાસીઓ માટે આશીર્વાદરૂપ સાબિત થશે જેઓ ટૂંકા સમય માટે રાજકોટની મુલાકાતે આવ્યા હોય અને પોતાનો ભારે સામાન સ્ટેશન પર સુરક્ષિત મૂકીને શહેરના દર્શનીય સ્થળોની મુલાકાત લેવા માંગતા હોય. આ સેવા ત્રણ વર્ષના કરાર હેઠળ શરૂ કરવામાં આવી છે. ઉલ્લેખનીય છે કે, રાજકોટ ડિવિઝન દ્વારા તાજેતરમાં જ આવી જ ‘સ્માર્ટ ડિજિટલ લોકર’ સુવિધા દ્વારકા અને જામનગર સ્ટેશન પર પણ શરૂ કરવામાં આવી છે.
લોકરના કદ અને સમય મુજબના શુલ્ક:
મુસાફરોની અનુકૂળતા માટે લોકરના બે પ્રકાર રાખવામાં આવ્યા છે. લાર્જ લોકર માટે 1 કલાકના ₹23.6 થી શરૂ કરીને 24 કલાકના ₹566.4 સુધીનો ચાર્જ નક્કી કરાયો છે. જ્યારે એક્સ્ટ્રા-લાર્જ લોકર માટે 1 કલાકના ₹35.4 થી લઈને 24 કલાકના ₹849.6 સુધીનું ભાડું નિર્ધારિત કરવામાં આવ્યું છે. મુસાફરોની જાણકારી માટે આ તમામ દર પત્રક ડિજિટલ લોકર પર પણ પ્રદર્શિત કરવામાં આવ્યા છે. પશ્ચિમ રેલ્વેના આ પગલાથી મુસાફરોને વિશ્વસ્તરીય અને ટેકનોલોજી આધારિત સુવિધાઓનો અનુભવ થશે.