​રાજકોટ: ભ્રષ્ટાચાર સામેની લડાઈમાં રાજકોટ એસીબીએ આજે એક મોટી સફળતા મેળવી છે. રેસકોર્સ ગ્રાઉન્ડ પાસે ગોઠવવામાં આવેલા લાંચના છટકામાં સેન્ટ્રલ જીએસટી (CGST)ના વર્ગ-૨ ના અધિકારી ધર્મેન્દ્ર યાદવને ૫,૦૦૦ની લાંચ લેતા સ્થળ પર જ દબોચી લેવામાં આવ્યા છે. ​આ કેસની વિગત એવી છે કે એક જાગૃત નાગરિકે તેના ભાગીદાર સાથે મળીને 'BIXPORT' નામની એક્સપોર્ટ-ઈમ્પોર્ટની કંપની શરૂ કરી હતી. આ કંપનીના વેરિફિકેશન માટેની પ્રક્રિયા દરમિયાન, આરોપી ધર્મેન્દ્ર સરયુપ્રસાદ યાદવ (ઉં.વ. ૩૦)એ ઓફિસના સરનામાની તપાસ કરી હતી. આ તપાસ બાદ ફાઇનલ રિપોર્ટ પોઝિટિવ આપવાના બદલામાં અધિકારીએ ૮ ફેબ્રુઆરીના રોજ ફરિયાદી પાસે ૫,૦૦૦ની માંગણી કરી હતી. 

ફરિયાદી લાંચ આપવા માંગતા ન હોવાથી તેમણે તુરંત રાજકોટ એસીબીનો સંપર્ક સાધ્યો હતો. ફરિયાદના આધારે એસીબીની ટીમે આજે એટલે કે ૯ ફેબ્રુઆરી ૨૦૨૬ના રોજ રેસકોર્સ ગ્રાઉન્ડ પાસે છટકું ગોઠવ્યું હતું. આરોપી ધર્મેન્દ્ર યાદવે જ્યારે પંચની હાજરીમાં ફરિયાદી સાથે હેતુલક્ષી વાતચીત કરી લાંચની રકમ સ્વીકારી, ત્યારે જ એસીબીની ટીમે તરાપ મારીને તેમને રકમ સાથે ઝડપી પાડ્યા હતા.

એસીબી વડા પિયુષ પટેલ, અધિક નિયામક બિપીન આહિરે તેમજ જે.ડી.મેવાડા (મદદનીશ નિયામક, એસીબી રાજકોટ), ​ઈન્ચાર્જ અધિકારી બલદેવસિંહ વાધેલા (નાયબ નિયામક, એસીબી રાજકોટ), ટ્રેપિંગ અધિકારી આર.આર.સોલંકી (પોલીસ ઇન્સ્પેક્ટર, એસીબી રાજકોટ)એ કામગીરી કરી હતી. ​એસીબીએ લાંચની રકમ રિકવર કરી આરોપી વિરુદ્ધ કાયદેસરની કાર્યવાહી હાથ ધરી છે. આ ઘટનાથી સરકારી કચેરીઓમાં લાંચિયા અધિકારીઓમાં ફફડાટ વ્યાપી ગયો છે.