રાજકોટ:સૌરાષ્ટ્રના પાટનગર ગણાતા રાજકોટમાં આજે ઉનાળાએ પોતાનું રૌદ્ર સ્વરૂપ બતાવ્યું છે. માર્ચ મહિનાના શરૂઆતના દિવસોમાં જ ગરમીનો પારો 40 ડિગ્રી સુધી પહોંચી જતા રાજકોટવાસીઓ તોબા પોકારી ઉઠ્યા છે. આ તાપમાન ચાલુ સિઝનનું અત્યાર સુધીનું સૌથી ઊંચું તાપમાન નોંધાયું છે.

બપોરના સમયે રસ્તાઓ પર સ્વયંભૂ કરફ્યુ જેવો માહોલ જોવા મળ્યો હતો. ગરમ પવનો (લૂ) ફૂંકાવાને કારણે ટુ-વ્હીલર ચાલકો અને રાહદારીઓ મુશ્કેલીમાં મુકાયા હતા.

 હવામાન વિભાગના જણાવ્યા અનુસાર, આગામી 3 થી 5 દિવસમાં તાપમાનમાં હજુ પણ વધારો થવાની શક્યતા છે. માત્ર રાજકોટ જ નહીં, પરંતુ અમદાવાદ અને અમરેલી જેવા શહેરોમાં પણ પારો 38-39 ડિગ્રીની આસપાસ રહ્યો છે.