રાજકોટ, તા. 9 : રાજકોટ મહાનગરપાલિકાના આરોગ્ય વિભાગમાં મોટા પાયે નાણાકીય ગેરરીતિ આચરવામાં આવી હોવાનો ચોંકાવનારો ખુલાસો થયો છે.  આ કૌભાંડને ઉજાગર કરવામાં આવ્યા બાદ તંત્ર હરકતમાં આવ્યું છે અને તાત્કાલિક તપાસના આદેશ આપી દેવામાં આવ્યા છે.

વિગતો મુજબ રાજકોટ મનપાના આરોગ્ય વિભાગ દ્વારા છેલ્લા એક વર્ષ દરમિયાન શહેરી આરોગ્ય કેન્દ્રો અને હોસ્પિટલો માટે દવાઓની ખરીદી કરવામાં આવી હતી. આંતરિક ઓડિટ રિપોર્ટમાં ખુલાસો થયો છે કે દવાઓની ખરીદીમાં મોટા પાયે ગેરરીતિ આચરવામાં આવી છે. બજાર ભાવ કરતા 40 થી 50 ટકા ઊંચા દરે દવાઓ ખરીદીને બોગસ બિલો બનાવી સરકારી નાણાંની ઉચાપત કરવામાં આવી છે.

આરોપ છે કે આરોગ્ય વિભાગના કેટલાક અધિકારીઓએ એક જ ચોક્કસ વેન્ડરને ફાયદો કરાવવા માટે ટેન્ડર પ્રક્રિયાના નિયમો નેવે મૂકી દીધા હતા. સ્પર્ધાત્મક ભાવો મેળવવાને બદલે મનફાવે તેવા ઊંચા ભાવે ખરીદી કરી લાખો રૂપિયાનું કમિશન પકવવામાં આવ્યું છે. ઓડિટ દરમિયાન અનેક દવાઓના બિલોમાં જથ્થા અને ભાવમાં મોટી વિસંગતતા પણ જોવા મળી છે.

આ ગંભીર ક્ષતિઓ ધ્યાને આવતા રાજકોટ મ્યુનિસિપલ કમિશનરે સમગ્ર મામલાની તપાસ માટે એક સ્પેશિયલ ઇન્વેસ્ટિગેશન ટીમ એટલે કે SITની રચના કરી છે. કમિશનરે જણાવ્યું કે તપાસમાં જે કોઈ અધિકારી કે કર્મચારીની સંડોવણી સામે આવશે તેની સામે કડક વિભાગીય તેમજ ફોજદારી કાર્યવાહી કરવામાં આવશે.

આ ઉપરાંત છેલ્લા ત્રણ વર્ષની તમામ દવા ખરીદીનું ફરીથી ઓડિટ કરાવવાના પણ આદેશ આપવામાં આવ્યા છે. આ ઘટનાને પગલે આરોગ્ય વિભાગના કર્મચારીઓમાં ફફડાટ વ્યાપી ગયો છે.