રાજકોટઃ ગુજરાત સરકારના સામાજિક ન્‍યાય અને અધિકારિતા તથા શિક્ષણ વિભાગના મંત્રી તથા કોડીનારના ધારાસભ્‍ય ડો. પ્રદ્યુમનભાઈ વાજા ‘અકિલા' કાર્યાલયના મહેમાન બન્‍યા હતા. ગુજરાત વિધાનસભાના સૌથી વધુ શિક્ષિત મંત્રીઓમાં સ્‍થાન ધરાવતા અને MBBS, DGO, MD, LLB તેમજ LLM જેવી ઉચ્‍ચ શૈક્ષણિક પદવીઓ ધરાવતા ડો. વાજાએ ‘અકિલા' પરિવારના મોભી શ્રી કિરીટભાઈ ગણાત્રા સાથે અકિલા લાઈવ ન્‍યૂઝમાં શિક્ષણ, સામાજિક કલ્‍યાણ અને સ્‍થાનિક રોજગારી સહિતના અનેકવિધ મુદ્દાઓ પર ગહન અને સળંગ ચર્ચા કરી હતી. આ ખાસ મુલાકાત દરમિયાન ડો. વાજાએ વડાપ્રધાન શ્રી નરેન્‍દ્રભાઈ મોદીની દીર્ઘદ્રષ્ટિ અને મુખ્‍યમંત્રી શ્રી ભૂપેન્‍દ્રભાઈ પટેલના નેતૃત્‍વમાં ચાલી રહેલા વિકાસ કાર્યોની વિસ્‍તૃત રૂપરેખા આપી હતી.

મંત્રી ડો. પ્રદ્યુમનભાઈ વાજાએ જણાવ્‍યું હતું કે, વડાપ્રધાન શ્રી નરેન્‍દ્રભાઈ મોદીએ દેશને જે 'રાષ્ટ્રીય શિક્ષણ નીતિ ૨૦૨૦' (NEP ૨૦૨૦) ભેટ આપી છે, તે સમગ્ર દેશના શિક્ષણ ક્ષેત્રમાં મૂળભૂત પરિવર્તન લાવનારી સાબિત થઈ રહી છે. વિદ્યાર્થીઓનો વિકાસ સંપૂર્ણ થાય, તેમનામાંથી ગોખણપટ્ટી દૂર થાય અને યુવાઓમાં રાષ્ટ્રપ્રેમની ભાવના જાગે તે માટે સમગ્ર શિક્ષણનું માળખું બદલવામાં આવ્‍યું છે. અભ્‍યાસક્રમમાં પણ પરિવર્તન કરીને નવી શિક્ષણ પદ્ધતિ અપનાવવામાં આવી છે. ગુજરાતમાં મુખ્‍યમંત્રી શ્રી ભૂપેન્‍દ્રભાઈ પટેલના માર્ગદર્શન હેઠળ પ્રાથમિક, માધ્‍યમિક તેમજ ઉચ્‍ચ શિક્ષણ ક્ષેત્રે ખૂબ જ સરસ અને પ્રશંસનીય કામગીરી થઈ રહી છે.

રાજ્‍યની સરકારી શાળાઓને લઈને મંત્રીશ્રી ડો.વાજાએ જણાવ્‍યું કે, પૂર્વ સમયની સરખામણીમાં વર્તમાનમાં સરકારી શાળાઓની કાયાપલટ થઈ ગઈ છે. શાળાઓના બિલ્‍ડીંગો સ્‍માર્ટ બન્‍યા છે. હવે શાળાઓમાં સ્‍માર્ટ લેબ, સ્‍માર્ટ બોર્ડ વગેરે સુવિધાઓ ઉપલબ્‍ધ કરાવીને ડિજિટલ શિક્ષણ તરફ મક્કમ કદમ ભરવામાં આવ્‍યા છે. શિક્ષકોની ઘટ અને બદલીના મામલે સરકારે પારદર્શક નીતિ અપનાવીને ૧૧,૦૦૦ જેટલા શિક્ષકોની ભરતીની પ્રક્રિયા હાથ ધરી છે. જ્‍યાં પણ વહીવટી પ્રક્રિયા બાકી છે ત્‍યાં વૈકલ્‍પિક વ્‍યવસ્‍થાના ભાગરૂપે જ્ઞાનસહાયકોની નિમણૂક કરીને શિક્ષણ કાર્ય અવિરત ચાલુ રાખવામાં આવ્‍યું છે.

ગુજરાતમાં હાયર એજ્‍યુકેશન અને ટેકનોલોજીના સમન્‍વય અંગે વાત કરતા ડો. વાજાએ ઉમેર્યું કે, હાયર એજ્‍યુકેશનમાં માત્ર ડિગ્રી આપવાને બદલે સ્‍કિલ પ્રોવાઈડ કરવા પર ભાર મૂકવામાં આવ્‍યો છે. આ માટે ઉદ્યોગો સાથે કોર્પોરેટ જોડાણ (MOU) કરીને વિદ્યાર્થીઓને સીધી ટ્રેનિગ અને કૌશલ્‍ય મળે તેવા સઘન કાર્યક્રમો ચલાવવામાં આવી રહી છે.

ખાનગી શાળાઓ દ્વારા અવારનવાર થતા ફી વધારા અને વાલીઓની ફરિયાદો અંગે પૂછાયેલા પ્રશ્નના જવાબમાં ડો.પદ્યુમન વાજાએ સ્‍પષ્ટ કર્યું હતું કે, વાલીઓની ફરિયાદોને ધ્‍યાને લઈને ફી નિયમન કમિટી (FRC)ને વધુ ધારદાર અને કડક બનાવવામાં આવશે. ફી નિયમનને લગતા કાયદાઓમાં જરૂર જણાશે તો યોગ્‍ય સુધારા પણ કરવામાં આવશે. રાજ્‍ય સ્‍તરે તેમજ પ્રદેશ સ્‍તરે કમિટીના તજજ્ઞો દ્વારા શિક્ષણ ક્ષેત્રના વહીવટની નજર રાખવામાં આવે છે. કોઈપણ પ્રકારની ગેરરીતિ કે ફરિયાદ આવશે તો તેમાં ચોક્કસપણે અને ત્‍વરિત કડક પગલાં લેવામાં આવશે.

પોતાના સામાજિક ન્‍યાય અને અધિકારિતા વિભાગ અંગે વાત કરતા મંત્રીડો.પદ્યુમનભાઈશ્રીએ જણાવ્‍યું કે, છેવાડાના અને વંચિત સમાજના લોકોને સરકારની તમામ કલ્‍યાણકારી યોજનાઓનો લાભ મળે તે માટે વિભાગ દ્વારા વ્‍યાપક પ્રચાર-પ્રસાર કરવામાં આવી રહ્યો છે. કોઈ પણ નાગરિકની ફરિયાદ હોય તો તેનું તાત્‍કાલિક નિવારણ લાવવા માટે અધિકારીઓને આદેશ આપવામાં આવ્‍યા છે. હાયર એજ્‍યુકેશન માટે અપાતી શિષ્‍યવૃત્તિ (સ્‍કોલરશિપ)ની યોજનામાં આવક મર્યાદા જે પહેલા ઓછી હતી, તેને ગુજરાત સરકારે આ બજેટમાં વધારીને રૂ.૫ લાખ સુધીની કરી દીધી છે, જેથી વધુમાં વધુ મધ્‍યમવર્ગીય અને પછાત વર્ગના વિદ્યાર્થીઓ ઉચ્‍ચ શિક્ષણ મેળવી શકે.

રાજ્‍યમાં કાર્યરત સમરસ છાત્રાલયો અંગે ડો. વાજાએ જણાવ્‍યું કે, આ છાત્રાલયો ખરા અર્થમાં ગરીબ અને તેજસ્‍વી વિદ્યાર્થીઓ માટે આશીર્વાદરૂપ બન્‍યા છે. તમામ સમરસ છાત્રાલયોનું નામ જ કોમન અને સમરસ છે, જ્‍યાં બધા જ વર્ગના વિદ્યાર્થીઓ એકસાથે રહીને અભ્‍યાસ કરે છે. પ્રવેશ પ્રક્રિયાને સંપૂર્ણપણે ઓનલાઈન અને પારદર્શક બનાવવામાં આવી છે. છાત્રાલયોના સુચારુ સંચાલન માટે ખાસ અધિકારીઓની નિમણૂક કરવામાં આવી છે. મંત્રીશ્રીએ તાજેતરમાં જ અધિકારીઓને કડક સૂચના આપી છે કે હોસ્‍ટેલની યોજનાઓ અને વ્‍યવસ્‍થાઓનું સતત મોનિટરિગ થવું જોઈએ.

કોડીનાર અને દરિયાકાંઠાના વિસ્‍તારના માછીમારો તેમજ સ્‍થાનિક રોજગારીના પ્રશ્ને ડો. પ્રદ્યુમનભાઈ વાજાએ એક મહત્‍વની જાહેરાત કરતા જણાવ્‍યું હતું કે, માછીમારી ક્ષેત્ર સાથે સંકળાયેલા લોકો માટે કોડીનાર નજીકના માઢવાડ ખાતે એક નવું અદ્યતન બંદર (જેટી) નિર્માણધીન છે. આ જેટીનું મોટાભાગનું કામકાજ પૂર્ણ થઈ ગયું છે. આ નવું બંદર કાર્યરત થવાથી ત્‍યાં આશરે ૫૦૦ જેટલી બોટોનું ટ્રાફિકિગ (લંગરવાની સુવિધા) થશે અને તેનાથી સ્‍થાનિક સ્‍તરે માછીમારી ઉદ્યોગ સાથે સંકળાયેલા હજારો લોકોને મોટી રોજગારી મળશે.

ડો.પદ્યુમનભાઈ વાજાએ મુલાકાતના અંતે મંત્રીશ્રીએ આત્‍મવિશ્વાસપૂર્વક જણાવ્‍યું કે, ગુજરાતમાં શિક્ષણ વિભાગ તમામ સ્‍તરે રાષ્ટ્રીય શિક્ષણ નીતિનું અમલીકરણ કરીને આગામી દિવસોમાં ગુજરાતના વિદ્યાર્થીઓને વૈશ્વિક સ્‍તરે સ્‍પર્ધા કરવા સક્ષમ બનાવી રહ્યું છે. સામાજિક ન્‍યાય વિભાગ પણ યુવાનોને પોતાના પગ પર ઊભા રાખીને આત્‍મનિર્ભર બનાવવા માટે કટિબદ્ધ છે.

વડાપ્રધાન શ્રી નરેન્‍દ્રભાઈ મોદીએ વર્ષ ૨૦૪૭ સુધીમાં જે 'વિકસિત ભારત' બનાવવાનું સપનું જોયું છે, તેને સાકાર કરવા માટે સૌ સાથે મળીને પ્રયાસ કરી રહ્યા છીએ અને એ જ અમારો સંકલ્‍પ છે.

આ પ્રસંગે કોર્પોરેટર શ્રી રાજુભાઈ અઘેરા પણ ઉપસ્‍થિત રહ્યા હતા. (૪૦.૨૨)

ડો. પ્રદ્યુમન વાજાના વિદ્યાર્થીકાળની અનોખી સફરઃ

રાજકુમાર કોલેજથી ગિરનાર સિનેમાની સેન્‍ડવીચ સુધી

રાજકોટની ઐતિહાસિક રાજકુમાર કોલેજના ભૂતપૂર્વ વિદ્યાર્થી અને જાણીતા વ્‍યક્‍તિત્‍વ ડો. પ્રદ્યુમન વાજાના જીવનના રસપ્રદ સંસ્‍મરણો પર એક નજરઃ શાહી શિક્ષણ વચ્‍ચે પણ સામાન્‍ય વિદ્યાર્થી જેવી જિદગી જીવ્‍યા

રાજકોટઃ શિક્ષણ અને સંસ્‍કારની નગરી રાજકોટ સાથે અનેક મહાનુભાવોના સંસ્‍મરણો જોડાયેલા છે. આવી જ એક જાણીતી અને આદરણીય હસ્‍તી એટલે ડો. પ્રદ્યુમન વાજા. તેમના પ્રારંભિક જીવન અને વિદ્યાર્થીકાળની કેટલીક એવી વાતો સામે આવી છે, જે તેમના સરળ, જીવંત અને ડાઉન-ટુ-અર્થ વ્‍યક્‍તિત્‍વની અનોખી ઝાંખી કરાવે છે. ડો. પ્રદ્યુમન વાજાએ પોતાનો પ્રારંભિક અભ્‍યાસ રાજકોટની વિશ્વવિખ્‍યાત અને ઐતિહાસિક રાજકુમાર કોલેજ માંથી પૂર્ણ કર્યો છે. અત્‍યંત શિસ્‍તબદ્ધ, ઉચ્‍ચ શિક્ષણ અને ભવ્‍ય રાજવી વારસો ધરાવતી આ પ્રતિષ્ઠિત સંસ્‍થાએ તેમના વ્‍યક્‍તિત્‍વના ઘડતરમાં મહત્‍વનો ભાગ ભજવ્‍યો છે. કોલેજના દિવસો દરમિયાન તેઓ એક તેજસ્‍વી, જિજ્ઞાસુ અને નમ્ર વિદ્યાર્થી તરીકે સહપાઠીઓ અને શિક્ષકોમાં લોકપ્રિય હતા. દરેક વિદ્યાર્થીના જીવનમાં અભ્‍યાસની સાથે-સાથે મિત્રો સાથે વિતાવેલી મસ્‍તી અને ખાનપાનની પળો પણ એટલી જ ખાસ હોય છે. ડો. પ્રદ્યુમન વાજા પણ તેમાંથી બાકાત નહોતા. રાજકુમાર કોલેજ જેવા ભવ્‍ય અને શાહી વાતાવરણમાં અભ્‍યાસ કરવા છતાં, તેઓ સામાન્‍ય રાજકોટીયનની જેમ જ જીવતા હતા. એ સમયના લોકપ્રિય અને જાણીતા ગિરનાર સિનેમા પાસે જઈને સેન્‍ડવીચ ખાવાનો તેમનો એક ચોક્કસ અને બંધાણી ક્રમ હતો.

કોલેજના ક્‍લાસ પૂરા થયા પછી કે રજાના દિવસોમાં મિત્રોના ગ્રુપ સાથે ગિરનાર સિનેમા પાસે પહોંચી જવું અને ત્‍યાંની લિજ્જતદાર સેન્‍ડવીચની મોજ માણવી, એ તેમના વિદ્યાર્થીકાળની સૌથી પ્રિય યાદોમાંની એક છે. તેમના જૂના મિત્રોના જણાવ્‍યા મુજબ, ડો. વાજા ગમે તેટલા વ્‍યસ્‍ત હોય તો પણ આ સેન્‍ડવીચ ખાવાનો મોકો ક્‍યારેય ચૂકતા નહીં.

એક તરફ રાજકુમાર કોલેજ જેવી હાઈ-પ્રોફાઈલ સંસ્‍થાનું વાતાવરણ અને બીજી તરફ સામાન્‍ય નાગરિકની જેમ થિયેટરની બહાર ઊભા રહીને લારી પર સેન્‍ડવીચ ખાવાનો આનંદઆ બે વિરોધાભાસી બાબતો જ દર્શાવે છે કે તેઓ શરૂઆતથી જ જમીન સાથે જોડાયેલા માણસ રહ્યા છે. આજે ભલે સમય બદલાયો હોય, પણ ગિરનાર સિનેમાની બહાર દોસ્‍તો સાથે વિતાવેલી એ ક્ષણો અને સેન્‍ડવીચનો સ્‍વાદ આજે પણ તેમના હૃદયમાં જીવંત છે. (૪૦.૨૧)

વિધાનસભાના ‘સુપર બ્રેઈન' કેબીનેટ મંત્રી ડો.પ્રદ્યુમન વાજાઃ જેમનું શિક્ષણ ભાથું જોઈને ભલભલા આશ્‍ચર્યમાં ગરકાવ થઈ જાય

ડોક્‍ટર પત્‍નીનો સાથ અને જનતાનો ફૂલ સપોર્ટઃ ભાજપ એસસી મોરચાના પૂર્વ પ્રદેશ અધ્‍યક્ષ અને મુખ્‍યમંત્રી ભૂપેન્‍દ્રભાઈ પટેલની સરકારના સૌથી શિક્ષિત મંત્રીનો કોડીનારથી કેબીનેટ સુધીનો પ્રવાસ

રાજકોટઃ ડો. પ્રદ્યુમનભાઈ ગનુભાઈ વાજા ગુજરાત સરકારના કેબિનેટ કક્ષાના મંત્રી છે. તેઓ ગીર સોમનાથ જિલ્‍લાની કોડીનાર બેઠક (અનુસૂચિત જાતિ માટે અનામત) પરથી ભારતીય જનતા પાર્ટી (BJP) ના ધારાસભ્‍ય તરીકે ચૂંટાયેલા છે. મુખ્‍યમંત્રી ભુપેન્‍દ્રભાઈ પટેલની સરકારના મંત્રીમંડળમાં તેમને મહત્‍વના વિભાગોની જવાબદારી સોંપવામાં આવી છે. તેઓની જીવન ઝરમર અને કારકિર્દી જોઈએ તો તેમનો જન્‍મ ૧૯૬૯માં થયો હતો. તેઓ મૂળ અમદાવાદના ઘાટલોડિયા વિસ્‍તારના વતની છે. ડો. વાજા ગુજરાત વિધાનસભાના સૌથી વધુ શિક્ષિત (બહુશિક્ષિત) ધારાસભ્‍યો અને મંત્રીઓમાં સ્‍થાન ધરાવે છે. તેમણે ૧૯૯૫માં ગુજરાત યુનિવર્સિટીમાંથી MBBS, DGO, અને MDની મેડિકલ ડિગ્રીઓ મેળવી હતી. આ ઉપરાંત, તેમણે ૨૦૨૨માં કાયદાનો અભ્‍યાસ કરી LLB અને LLMની ડિગ્રી પણ પ્રાપ્ત કરી છે.

રાજકારણમાં સક્રિય થતા પહેલાં તેઓ સરકારી મેડિકલ સેવામાં એક ડોક્‍ટર તરીકે ફરજ બજાવતા હતા. તેમનાં પત્‍ની પણ વ્‍યવસાયે ડોક્‍ટર છે.

સરકારી સેવામાંથી નિવૃત્તિ લીધા બાદ તેમણે ભાજપ સાથે રાજકીય કારકિર્દી શરૂ કરી. તેઓ ગુજરાત ભાજપના ‘એસસી મોરચા' ના પ્રદેશ અધ્‍યક્ષ તરીકે પણ સેવા આપી ચૂક્‍યા છે. ૨૦૨૨ની ગુજરાત વિધાનસભાની ચૂંટણીમાં તેમણે કોડીનાર બેઠક પરથી ૭૭,૭૯૪ મતો મેળવીને કોંગ્રેસના ઉમેદવાર મહેશ મકવાણાને ૧૯,૩૮૬ મતોની જંગી સરસાઈથી હરાવ્‍યા હતા.

ગુજરાત સરકારના મંત્રીમંડળમાં ડો. પ્રદ્યુમન વાજાને નીચે મુજબનાં મહત્‍વનાં ખાતાઓ ફાળવવામાં આવ્‍યા છે

૧. સામાજિક ન્‍યાય અને અધિકારિતાઃ શું કામ થાય છે?: આ વિભાગ અંતર્ગત રાજ્‍યના અનુસૂચિત જાતિ (SC), અનુસૂચિત જનજાતિ (ST), બક્ષીપંચ (OBC) અને અન્‍ય નબળા વર્ગોના કલ્‍યાણ માટે કામગીરી થાય છે. છેવાડાના માનવીને સરકારી યોજનાઓનો લાભ પહોંચાડવો, વિદ્યાર્થીઓને શિષ્‍યવૃત્તિ આપવી, સમરસ છાત્રાલયોનું સંચાલન કરવું અને દલિત-પછાત સમાજના સામાજિક અને આર્થિક ઉત્‍કર્ષ માટેની નીતિઓ ઘડવાનું કાર્ય આ ખાતામાં આવે છે.

 ૨. પ્રાથમિક, માધ્‍યમિક, અને પ્રૌઢ શિક્ષણઃ શું કામ થાય છે?: આ વિભાગ રાજ્‍યની સરકારી, ગ્રાન્‍ટેડ અને ખાનગી શાળાઓના ધોરણ ૧ થી ૧૨ ના શિક્ષણનું સંચાલન કરે છે. શાળાઓમાં શિક્ષકોની ભરતી, અભ્‍યાસક્રમમાં સુધારા, બાળકોને મફત અને ફરજિયાત શિક્ષણ, તથા માળખાગત વિકાસ પર ધ્‍યાન આપવામાં આવે છે. ઉપરાંત, મોટી ઉંમરના નિરક્ષર લોકોને સાક્ષર બનાવવા માટે ‘પ્રૌઢ શિક્ષણ' કાર્યક્રમો ચલાવવામાં આવે છે.

 ૩.ઉચ્‍ચ અને ટેકનિકલ શિક્ષણઃ શું કામ થાય છે? રાજ્‍યની તમામ યુનિવર્સિટીઓ, આર્ટસ-કોમર્સ-સાયન્‍સ કોલેજો, એન્‍જાિનિયરિગ કોલેજો અને પોલિટેકનિક સંસ્‍થાઓનું નિયમન આ વિભાગ હેઠળ થાય છે. વિદ્યાર્થીઓને ઉચ્‍ચ શિક્ષણ માટે આધુનિક સુવિધાઓ પૂરી પાડવી અને રોજગારલક્ષી ટેકનિકલ કૌશલ્‍ય મળી રહે તેવા અભ્‍યાસક્રમો તૈયાર કરવાનું કાર્ય આ વિભાગ સંભાળે છે.

ડો. વાજાનું તબીબી અને કાયદાકીય જ્ઞાન તેમને શિક્ષણ અને સામાજિક કલ્‍યાણના આ મહત્‍વપૂર્ણ વિભાગોનો વહીવટ સુદ્રઢ રીતે ચલાવવામાં અત્‍યંત ઉપયોગી સાબિત થઈ રહ્યું છે.

કોડીનાર વિધાનસભા ખાતે ડો.પ્રદ્યુમન વાજાની સભા

આ વિડીયોમાં તમે ડો. પ્રદ્યુમન વાજાની કોડીનાર વિધાનસભા વિસ્‍તારની એક જાહેર સભાની ઝલક જોઈ શકો છો, જે તેમના સ્‍થાનિક જનસંપર્કનો ખ્‍યાલ આપે છે.