રાજકોટ : રાજ્યમાં આગામી વર્ષે યોજાનારી વિધાનસભાની ચૂંટણીના ધમધમાટ વચ્ચે સૌરાષ્ટ્રના રાજકારણમાં મોટો ધડાકો થયો છે. રાજકોટ ભાજપમાં લાંબા સમયથી સક્રિય અને પૂર્વ મહામંત્રી રહી ચૂકેલા દિગ્ગજ નેતા રણછોડભાઈ ઉઘરેજાએ પોતાના વિશાળ સમર્થકો અને કાર્યકર્તાઓના કાફલા સાથે ભાજપનો છેડો ફાડી વિધિવત રીતે કોંગ્રેસનો ભગવો હાથ પકડી લેતાં સ્થાનિક રાજકારણમાં ગરમાવો આવી ગયો છે.

આ રાજકીય પક્ષપલટા માટે કોંગ્રેસ દ્વારા એક ખાસ જોડાણ કાર્યક્રમનું આયોજન કરવામાં આવ્યું હતું. જેમાં ગુજરાત પ્રદેશ કોંગ્રેસ OBC ડિપાર્ટમેન્ટના ચેરમેન ડૉ. મહેશભાઈ રાજપૂતની ઉપસ્થિતિમાં રણછોડભાઈ ઉઘરેજા અને તેમના સાથી આગેવાનોને ખેસ પહેરાવીને કોંગ્રેસમાં આવકારવામાં આવ્યા હતા. ચૂંટણી પહેલા ભાજપના પાયાના સંગઠનમાં ગાબડું પડતાં પક્ષીય વર્તુળોમાં ભારે ચર્ચા જાગી છે.

ભાજપ સાથેનો દાયકાઓ જૂનો નાતો તોડ્યા બાદ રણછોડભાઈ ઉઘરેજાએ પક્ષ સામે આકરા પ્રહારો કર્યા હતા. તેમણે ગંભીર આક્ષેપ કરતા જણાવ્યું હતું કે, ભાજપમાં તેમના સમાજની સતત ઉપેક્ષા કરવામાં આવી રહી છે. સામાજિક અને વસ્તીની દ્રષ્ટિએ મોટો સમુદાય હોવા છતાં છેલ્લા ૩૫ વર્ષથી સમાજના એક પણ આગેવાનને યોગ્ય રાજકીય સ્થાન કે પ્રતિનિધિત્વ આપવામાં આવ્યું નથી, જેના કારણે નારાજ થઈને તેમણે આ નિર્ણય લીધો છે.

બીજી તરફ, પૂર્વ મહામંત્રીના આ આક્ષેપો અને પક્ષપલટાને લઈને સ્થાનિક ભાજપ સંગઠન કે નેતાગીરી તરફથી હજુ સુધી કોઈ સત્તાવાર પ્રતિક્રિયા સામે આવી નથી. પરંતુ વિધાનસભા ચૂંટણી પૂર્વે રાજકોટ ભાજપના આંતરિક અસંતોષ બહાર આવતાં કોંગ્રેસને નવું બળ મળ્યું છે. હવે આ પક્ષપલટાથી રાજકોટના આગામી રાજકીય સમીકરણો પર કેટલી અસર પડે છે તેના પર સૌની નજર મંડાયેલી છે.