રાજકોટ લોધિકા ખરીદ વેચાણ સંઘમાં ચૂંટણી સંપન્ન થયા બાદ પણ સત્તાનો મામલો ગૂંચવાયો છે. સંઘના તમામ ડિરેક્ટરો ચૂંટાઈ આવ્યા હોવા છતાં ચેરમેન અને વાઇસ ચેરમેન પદની વરણી હજુ સુધી અટકી પડી છે. સંઘનું સુકાન કોના હાથમાં સોંપવું તે અંગે ભારતીય જનતા પાર્ટીના બે આંતરિક જૂથો વચ્ચે તીવ્ર ખેંચતાણ ચાલી રહી છે, જેના કારણે સત્તાની અંતિમ ઘોષણા હાલ અધ્ધરતાલ બની ગઈ છે

રાજકોટ લોધિકા સંઘ માત્ર એક સહકારી સંસ્થા નથી, પરંતુ કરોડો રૂપિયાનું આર્થિક ટર્નઓવર અને વિશાળ અનામત ભંડોળ ધરાવતું શક્તિશાળી સંગઠન છે. તાજેતરમાં જ ભાજપના વરિષ્ઠ નેતા પરષોત્તમભાઈ રૂપાલાએ આ સંઘ પાસે રહેલા કરોડોના ફંડ અંગે જાહેરમાં ટકોર કરી હતી. આ ટકોર બાદ સંઘના આર્થિક વહીવટ પર અંકુશ મેળવવા માટેનો રાજકીય ગરમાવો પરાકાષ્ઠાએ પહોંચ્યો છે. સંસ્થાના નાણાકીય સંસાધનો અને સત્તાનું સંતુલન જાળવવા ભાજપના બંને જૂથો આમને-સામને આવી ગયા છે.

સહકારી રાજકારણના કદાવર નેતા અને પૂર્વ કેબિનેટ મંત્રી જયેશ રાદડિયાનું પલડું આ ચૂંટણીમાં ભારે દેખાઈ રહ્યું છે. સંઘના કુલ સભ્યોમાંથી જયેશ રાદડિયા જૂથ પાસે હાલ 10 થી 11 ડિરેક્ટરોનું સ્પષ્ટ સંખ્યાબળ હોવાનું સામે આવ્યું છે. લોકશાહી ઢબે બહુમતી રાદડિયા જૂથ તરફ હોવા છતાં પક્ષના સંગઠન સ્તરે સર્વસંમતિ સાધવાના પ્રયાસો ચાલી રહ્યા છે. રાદડિયા જૂથ પોતાના વિશ્વાસુ સાથીને ચેરમેન પદે બેસાડવા મક્કમ વલણ અપનાવી રહ્યું છે.

ચેરમેન પદ માટે બંને જૂથોમાંથી પ્રભાવશાળી નામો આગળ આવી રહ્યા છે. રાદડિયા જૂથ તરફથી સહકારી આગેવાન નિતીન ઢાકેચા અને સંજય અમરેલીયાનું નામ મોખરે ચાલી રહ્યું છે. આ બંને આગેવાનો સંસ્થાના વહીવટમાં લાંબો અનુભવ ધરાવે છે.

સામા પક્ષે રાજકોટ જિલ્લા ભાજપ સંગઠન જૂથ તરફથી બાબુભાઈ નસીત સહિતના વરિષ્ઠ આગેવાનોના નામની ચર્ચા જોરશોરથી ચાલી રહી છે. સંગઠન જૂથ પોતાના પક્ષધરને શાસન સોંપવા પૂરજોશમાં પ્રયાસ કરી રહ્યું છે.

સ્થાનિક સ્તરે સમાધાન ન થતાં હવે આ સમગ્ર વિવાદ ગાંધીનગર પ્રદેશ ભાજપ હાઈકમાન્ડ સમક્ષ પહોંચ્યો છે. સહકારી ક્ષેત્રમાં જૂથવાદ વકરે નહીં તે માટે પક્ષ દ્વારા મેન્ડેટ જાહેર કરવાની તૈયારીઓ ચાલી રહી છે. જોકે, સંઘમાં 10 થી 11 ડિરેક્ટરોનું સંખ્યાબળ ધરાવતું જૂથ પક્ષના વલણ સામે શું વલણ દાખવે છે તેના પર સમગ્ર સૌરાષ્ટ્રના સહકારી આલમની નજર ટકેલી છે.