રાજકોટ:ભારતીય સંસ્કૃતિના મહાપર્વ દીપોત્સવી તેમજ નૂતન વર્ષ નિમિત્તે સમગ્ર દેશમાં ઉત્સાહનો માહોલ જોવા મળી રહ્યો છે, ત્યારે કાલાવડ રોડ પર આવેલા ભવ્ય બી.એ.પી.એસ. સ્વામિનારાયણ મંદિરને દીવડા, તોરણ અને કલાત્મક રંગોળીઓથી દિવ્ય રૂપ આપવામાં આવ્યું છે. આ પાવન અવસર પર વિક્રમ સંવત ૨૦૮૨ ના પ્રારંભે પ્રમુખસ્વામી સભાગૃહ ખાતે વિશેષ વૈદિક ચોપડાપૂજનવિધિનું આયોજન કરવામાં આવ્યું હતું. સભાગૃહમાં પ્રવેશદ્વાર પર જ પૂજ્ય સંતો દ્વારા સૌ ભક્તોને ચંદનનો ચાંદલો કરી નાડાછડી બાંધીને આવકારવામાં આવ્યા હતા, જેણે સમગ્ર વાતાવરણને આધ્યાત્મિક અને ઉમંગભર્યું બનાવી દીધું હતું.

રાજકોટ શહેરના અનેક અગ્રણી ઉદ્યોગપતિઓ અને વ્યાપારીઓ પોતાના પરંપરાગત ચોપડાઓની સાથે-સાથે આધુનિક યુગના પ્રતીક સમાન ૧૫૦ જેટલા લેપટોપ અને ટેબ્લેટ જેવા ડિજિટલ ઉપકરણો સાથે આ પૂજનવિધિમાં ઉત્સાહભેર ઉપસ્થિત રહ્યા હતા. મંદિરના વિદ્વાન સંતો પૂ. અક્ષરકિર્તી સ્વામી અને પૂ. અમૃતકીર્તન સ્વામીના માર્ગદર્શન હેઠળ તબલા, હાર્મોનિયમ અને ઓક્ટોપેડના સુમધુર સંગીતમય તાલ સાથે વૈદિક મહાપૂજાવિધિ સંપન્ન થઈ હતી. આ તકે પૂજ્ય અપૂર્વમુનિ સ્વામીએ વેપારી વર્ગને ધંધાકીય ક્ષેત્રે શ્રેષ્ઠ અને સફળ બિઝનેસમેન બનવા માટે મૂલ્યવાન જીવનમંત્રો અને પ્રેરણાદાયી માર્ગદર્શન પૂરું પાડ્યું હતું, જેમાં ધર્મને કેન્દ્રમાં રાખીને પુરુષાર્થ, નીતિમત્તા અને સમય સાથે ટેક્નોલોજી અપનાવવાની વિશેષ વાત કરવામાં આવી હતી.

પૂજનવિધિના અંતિમ ચરણમાં તમામ હરિભક્તોએ પૂજાપાના પાના પર આશીર્વચનનું લેખન કર્યું હતું તેમજ પ્રગટ ગુરુહરિ મહંતસ્વામી મહારાજના વિડિયો આશીર્વચનનો દિવ્ય લાભ પ્રાપ્ત કર્યો હતો. સંતોએ ઉપસ્થિત તમામ ઉદ્યોગપતિઓ અને વ્યાપારીઓના ચોપડા પર ઠાકોરજીના પ્રાસાદિક પુષ્પ અને અક્ષતની વૃષ્ટિ કરી સફળતાના આશીર્વાદ પાઠવ્યા હતા. ત્યારબાદ નૂતન વર્ષના પ્રથમ દિને ઠાકોરજીને નવા વાઘા પરિધાન કરાવીને શણગાર આરતી સાથે મંગલ પ્રારંભ કરવામાં આવ્યો હતો. મહંતસ્વામી મહારાજના દિવ્ય આશીર્વાદથી રાજકોટ મંદિર ખાતે ૧૫૦૦ થી વધુ શુદ્ધ, સાત્વિક અને શાકાહારી વાનગીઓનો ભવ્ય અન્નકૂટ રચવામાં આવ્યો છે, જેમાં મધ્યમાં રાંધેલા ચોખાનો 'ગોવર્ધન પર્વત' હિન્દુ પરંપરાગત શૈલી મુજબ સુશોભિત કરવામાં આવ્યો છે.

આ ભવ્ય ઉત્સવની આગામી કડી અને વ્યાપક આયોજન હેઠળ રાજકોટના રાજકીય, સામાજિક અગ્રણીઓ તેમજ હજારો શહેરીજનોની ઉપસ્થિતિમાં નીલકંઠવર્ણી મંડપ અને મુખ્ય મંદિર સમક્ષ અન્નકૂટ આરતીનો ક્રમ સતત સાંજે ૭:૦૦ વાગ્યા સુધી ચાલુ રહેશે. દર્શનાર્થીઓ કોઈપણ પ્રકારની અગવડ વિના શાંતિપૂર્વક દર્શન કરી શકે તે માટે સ્વયંસેવક કાર્યકરોની ટીમ ખડેપગે સેવા આપી રહી છે, અને આ અન્નકૂટનો મહાપ્રસાદ રાજકોટ શહેર તેમજ ગ્રામ્ય વિસ્તારોના હજારો ભાવિકો સુધી પહોંચાડવામાં આવશે. અદ્ભુત સુશોભન અને શ્રદ્ધાના આ મહાસંગમમાં પરિવાર અને મિત્રજનો સાથે જોડાઈને દર્શન-આશીર્વાદનો લાભ લેવા કોઠારી પૂ. બ્રહ્મતીર્થ સ્વામી અને સંત નિર્દેશક પૂ. અપૂર્વમુનિ સ્વામીએ હાર્દિક નિમંત્રણ પાઠવ્યું છે.