રાજકોટ, તા.૧૬: રાજ્‍ય સરકારના વિવિધ વિભાગોમાં ફરજ બજાવતા આઉટર્સોસિંગ, કરાર આધારિત કે અંશકાલીન કર્મચારીઓ જો લાંચ લેતા કે ભ્રષ્ટાચાર આચરતા પકડાશે, તો હવેથી તેમની સામે પણ સરકારી અધિકારીઓની જેમ જ ‘જાહેર સેવક' ગણીને કડક કાનૂની અને પ્રોસીકયુશનની કાર્યવાહી કરવામાં આવશે. પ્રોસીકયુશનની મંજૂરી મેળવવામાં ઊભા થતા પ્રશ્નોના નિરાકરણ માટે મહેસૂલ અને ગળહ વિભાગની ઉચ્‍ચ સ્‍તરીય બેઠકમાં આ મહત્‍વપૂર્ણ નિર્ણય લેવામાં આવ્‍યો છે.

તાજેતરમાં પાટણ જિલ્લાના ચાણસ્‍મા ખાતે આવેલી મામલતદાર કચેરીમાં આઉટ-ર્સોસિંગથી ફરજ બજાવતો એક કમ્‍પ્‍યુટર ઓપરેટર એન્‍ટી કરપ્‍શન બ્‍યુરો દ્વારા લાંચ લેતા રંગેહાથ ઝડપાઈ ગયો હતો. આ ઘટના બાદ તે કર્મચારી આઉટસોર્સનો હોવાથી તેને ‘જાહેર સેવક' ગણવો કે નહીં અને તેની સામે પ્રોસીકયુશન (કાનૂની ખટલો) ચલાવવાની મંજૂરી આપવી કે નહીં, તે અંગે મોટો પ્રશ્ન ઊભો થયો હતો.સરકારના આ આકરા નિર્ણયથી હવે ભ્રષ્ટાચારમાં પકડાતા આઉટર્સોસિંગ કર્મીઓ કાનૂની છટકબારીનો લાભ લઈ શકશે નહીં અને કલેક્‍ટરો દ્વારા પ્રોસીકયુશનની મંજૂરી આપવાની પ્રક્રિયા અત્‍યંત ઝડપી અને સરળ બનશે.