રાજકોટઃ શહેરમાં દિવાળીની રાતે ફટાકડા ફોડવા મામલે થયેલી માથાકુટની સાથે સાથે એક મોટો ડખ્‍ખો થયો હતો. રૈયા ગામમાં રહેતાં પરમાર પરિવારના બાળકો ફટાકડા ફોડતાં હોઇ આ બાબતે પાડોશી ફીઝાબેન અને તેના માતાને પરમાર પરિવારના દિકરા-વહુ સાથે બોલાચાલી થઇ હતી. બાદમાં ફીઝાબેને હું આનો બદલો લઇશ તેમ કહ્યા બાદ પરમાર પરિવારના લોકો મોરબી તેમના બીજા ઘરે જવા નીકળ્‍યા એ પછી પાડોશી યુવતિએ માણસો બોલાવી ઘર ઉપર બોટલોના ઘા કરાવી તોડફોડ કરાવડાવી તેમજ બે કાર, જીપ, બૂલેટ, બે એક્‍ટીવા અને આર-૧૫ બાઇક, એક પલ્‍સર મળી ૮ વાહનો સળગાવી દઇ કુલ રૂા. ૨૬.૫૦ લાખની નુકસાની કરતાં પોલીસે તપાસ હાથ ધરી છે.

આ બનાવમાં યુનિવર્સિટી પોલીસે રૈયા ગામ મુક્‍તિધામની સામેની શેરીમાં ખોડીયારનગર ખાતે રહેતાં એવીપીટીના નિવૃત કર્મચારી અને રેવન્‍યુનું કામ કરતાં રણજીતભાઇ ધુડાજીભાઇ પરમાર (ઉ.વ.૬૦)ની ફરિયાદ પરથી તેમના જ પાડોશી ફીઝાબેન અને ત્રણ અજાણ્‍યા શખ્‍સો સામે ગુનો નોંધી તપાસ હાથ ધરી છે. આરોપીઓ ભાગી ગયા હોઇ પોલીસે તપાસ શરૂ કરી છે.