રાજકોટ, તા. ર૭ : રાજકોટ શહેરમાં આજે ઉનાળાના આકરા તાપ અને અગનવર્ષાએ જનજીવનને ખોરવી નાખ્‍યું છે. કાળઝાળ ગરમીની સાથે ફૂંકાતા તેજ પવનોએ લોકોની મુશ્‍કેલીમાં અનેકગણો વધારો કરી દીધો છે. આજે બપોરે ૨:૩૦ વાગ્‍યે શહેરનું તાપમાન ૪૨.૮ ડિગ્રી સેલ્‍સિયસ નોંધાતા રસ્‍તાઓ પર સન્નાટો છવાઈ ગયો હતો.

હવામાન વિભાગના ડેટા મુજબ, આજે શહેરમાં ૨૬ કિલોમીટર પ્રતિ કલાકની ઝડપે ગરમ પવનો ફૂંકાઈ રહ્યા છે. સામાન્‍ય રીતે ગરમી વધારે હોય ત્‍યારે લોકો ઠંડી છાંયડાની શોધ કરે છે, પરંતુ આજે ફૂંકાતા આ ગરમ પવન (લૂ) ને કારણે ગરમીની અસર વધુ તીવ્ર વર્તાઈ રહી છે. બપોરના સમયે ઘરની બહાર નીકળવું પણ લોકો માટે પડકારરૂપ બની ગયું છે.

આકરા તાપ અને ગરમ પવનના ડબલ એટેકને કારણે બપોરે ૧૨ વાગ્‍યા બાદથી જ મુખ્‍ય માર્ગો પર ટ્રાફિક નહિવત જોવા મળ્‍યો હતો. નોકરી-ધંધાર્થે બહાર નીકળેલા લોકો પણ ગરમીથી બચવા માટે મોઢે દુપટ્ટો બાંધીને અથવા તો છત્રીનો સહારો લઈને નીકળતા જોવા મળ્‍યા હતા. શહેરના ચોક-ચોરાહે ઠંડા પીણા અને શેરડીના રસની દુકાનો પર લોકોની ભીડ જોવા મળી રહી છે.