સૌરાષ્ટ્ર પ્રો ટી ર૦ લીગ ર૦ર૬ માટે ખેલાડીઓનું ડ્રાફટીંગઃ જુનમાં ક્રિકેટનો રોમાંચ
નિરંજન શાહ ક્રિકેટ સ્ટેડીયમ ખાતે જામશે હાઇવોલ્ટેજ જંગઃ પાંચ ટીમો, ૧૮ ખેલાડીઓની પસંદગી સાથે ફ્રેન્ચાઇઝીઓ સજજ પ્રતિભાને કોઇ પોસ્ટકોડ નથી હોતો અને જુસ્સાને કોઇ પૃષ્ઠભૂમિની જરૂર હોતી નથીઃ જયદેવ શાહ પૂર્વ દિગ્ગજ ક્રિકેટર મદનલાલ અને શેલ્ડન જેકસનની ઉપસ્થિતિ પાંચ ટીમો એચવીએસ કચ્છ વોરિયર્સ, ગોહિલવાડ ટાઇટન્સ, ઝાલાવાડ સ્ટ્રાઇકર્સ, એરેનેકસ સૌરઠ સિંહો, અનમોલ કિંગ્સ હાલાર
રાજકોટઃસૌરાષ્ટ્ર ક્રિકેટ એસોસિએશન એસસીએ દ્વારા આગામી ‘સૌરાષ્ટ્ર પ્રો ટી૨૦ લીગ એસપીટીએલ ૨૦૨૬'માટે ખેલાડીઓના ડ્રાફિ્ટંગની પ્રક્રિયા સફળતાપૂર્વક પૂર્ણ થવાની સત્તાવાર જાહેરાત કરવામાં આવી છે. એસોસિએશનની આ ખૂબ જ લોકપ્રિય ટૂર્નામેન્ટની આ બીજી આવૃત્તિ છે, જે આગામી જૂન ૨૦૨૬માં રાજકોટના પ્રતિષ્ઠિત નિરંજન શાહ સ્ટેડિયમ ખાતે રમાશે. આ જાહેરાતથી ક્રિકેટપ્રેમીઓમાં ભારે ઉત્સાહ જોવા મળી રહ્યો છે.
ફ્રેન્ચાઇઝ આધારિત એસપીટીએલ ડ્રાફિ્ટંગ પ્રક્રિયામાં દરેક ટીમે પોતાના સ્ક્વોડ માટે ૧૮-૧૮ ખેલાડીઓની પસંદગી કરી હતી. આ પ્રક્રિયામાં એપેક્સ કાઉન્સિલ, ક્રિકેટ સલાહકાર, પસંદગીકારો અને એસસીએના અન્ય સભ્યો તેમજ ફ્રેન્ચાઇઝ માલિકો, કોચ, ખેલાડીઓ અને ક્રિકેટ નિષ્ણાતોએ ઉત્સાહપૂર્વક ભાગ લીધો હતો. આ વ્યાપક ભાગીદારી લીગની બીજી સીઝન પ્રત્યે વધી રહેલા આકર્ષણ અને રોમાંચને પ્રતિબિંબિત કરે છે.
બીસીસીઆઈના ભૂતપૂર્વ માનનીય સચિવ શ્રી નિરંજન શાહે જણાવ્યું હતું કે, ‘‘ટૂર્નામેન્ટના પ્રથમ સંસ્કરણની અસાધારણ સફળતા પછી, સૌરાષ્ટ્ર ક્રિકેટ એસોસિએશન આ બીજા પ્રકરણ માટે સંપૂર્ણપણે તૈયાર છે. બધા ખેલાડીઓ ખૂબ જ સ્પર્ધાત્મક અને રોમાંચક ટૂર્નામેન્ટની આતુરતાથી રાહ જોઈ રહ્યા છે.'' તેમણે ઉમેર્યું કે ટી૨૦ ફોર્મેટ ક્રિકેટનું સૌથી લોકપ્રિય સ્વરૂપ બની ગયું હોવાથી, એસસીએદ્વારા આયોજિત આ ટૂર્નામેન્ટ સૌથી મહત્વપૂર્ણ આયોજનોમાંની એક છે. આ ટૂર્નામેન્ટ પાછળ એસોસિએશનનો મુખ્ય ઉદ્દેશ્ય સ્થાનિક ખેલાડીઓ અને સપોર્ટ સ્ટાફને શ્રેષ્ઠ પ્લેટફોર્મ અને એક્સપોઝર પૂરું પાડવાનો છે, જેથી પ્રતિભાશાળી ખેલાડીઓ રાષ્ટ્રીય અને આંતરરાષ્ટ્રીય સ્તરે પોતાની ઓળખ બનાવી શકે. તેમણે તમામ ખેલાડીઓને હૃદયપૂર્વક શુભેચ્છાઓ પાઠવી હતી.
બીસીસીઆઈના એપેક્સ કાઉન્સિલ સભ્ય શ્રી જયદેવ શાહે પોતાના પ્રેરણાદાયી ભાષણમાં જણાવ્યું હતું કે, આજનો દિવસ ફક્ત ખેલાડીઓની પસંદગી કરવાનો નથી, પરંતુ સપનાઓની પસંદગીનો અને તકો ઊભી કરવાનો છે. આજનો દિવસ સૌરાષ્ટ્ર ક્રિકેટના ભવિષ્યના નિર્માણનો છે. તેમણે ઉમેર્યું કે, સૌરાષ્ટ્રમાં ક્રિકેટ હંમેશા જુસ્સા, શિસ્ત, મહેનત અને નિર્ભય ભાવના પર આધારિત રહ્યું છે. નાના શહેરોના ધૂળિયા મેદાનોથી લઈને સ્ટેડિયમ સુધી આપણી પ્રદેશે સતત નોંધપાત્ર પ્રતિભાઓ આપી છે.
ખેલાડીઓને પ્રોત્સાહિત કરતા તેમણે એક સુવર્ણ વાક્ય કહ્યું કે, ‘‘પ્રતિભાને કોઈ પોસ્ટકોડ નથી હોતો, અને જુસ્સાને કોઈ પૃષ્ઠભૂમિની જરૂર નથી હોતી.''તમે મોટા શહેર, નાના ગામ કે સ્થાનિક મેદાન પરથી આવ્યા હો, આ લીગ દરેક ખેલાડીને સમાન તક આપે છે. તેમણે ખેલાડીઓને ત્રણ બાબતો સાથે રમવાની શીખ આપીઃ સૌરાષ્ટ્ર માટે ગૌરવ, રમત માટે આદર અને પોતાનામાં વિશ્વાસ.
સૌરાષ્ટ્ર પ્રો ટી૨૦ લીગના ચેરમેન શ્રી જયવીર શાહે તમામ એસોસિએશન સભ્યો, ફ્રેન્ચાઇઝ માલિકો, કોચ અને એસસીએવર્ક ફોર્સનો આભાર માનતા આશા વ્યક્ત કરી હતી કે, આ લીગ ગુજરાતભરના હજારો યુવાન છોકરા-છોકરીઓને બેટ-બોલ ઉપાડવા અને મોટા સપના જોવા માટે પ્રેરણા આપશે.
આ ડ્રાફિ્ટંગ પ્રક્રિયામાં પોતાના યુગના શ્રેષ્ઠ પેસ બોલરોમાંના એક અને ૧૯૮૩ની ભારતીય વર્લ્ડ કપ વિજેતા ટીમના ગૌરવશાળી સભ્ય શ્રી મદન લાલ ખાસ ઉપસ્થિત રહ્યા હતા, જેમણે ‘ટીમ ગોહિલવાડ ગ્લેડીયેટર્સ'ના માર્ગદર્શક (મેન્ટર) તરીકે ભાગ લીધો હતો. આ ઉપરાંત સૌરાષ્ટ્રના ભૂતપૂર્વ અને પ્રખ્યાત વિકેટકીપર બેટ્સમેન શેલ્ડન જેક્સને પણ આ પ્રક્રિયામાં સક્રિય ભાગ લીધો હતો. સમગ્ર ડ્રાફિ્ટંગ પ્રક્રિયાનું સંચાલન સીએ મનન વઢિલ અને તેમની ચાર્ટર્ડ એકાઉન્ટન્ટ ફર્મ ‘ગૌતમ આર. વઢિલ એન્ડ કંપની'દ્વારા ન્યાયી અને પારદર્શક રીતે કરવામાં આવ્યું હતું, જયારે કાર્યક્રમનું સંચાલન સુહેલ ચાંદોક દ્વારા કરવામાં આવ્યું હતું.
(4:26 PM IST)
