​રાજકોટ: રાજકોટ મહાનગરપાલિકા (RMC) દ્વારા જંગલેશ્વર વિસ્તારમાં કરવામાં આવેલા ગેરકાયદે બાંધકામોના ડિમોલિશન દરમિયાન થયેલા અધધ ખર્ચ અને કથિત ભ્રષ્ટાચારના વિવાદમાં આખરે તપાસ પ્રક્રિયા પૂર્ણ થઈ ગઈ છે. મનપા તંત્ર અને વિજીલન્સ વિભાગ દ્વારા હાથ ધરવામાં આવેલી આ તપાસનો આખરી અહેવાલ તૈયાર કરી દેવામાં આવ્યો છે, જેણે મહાનગરપાલિકાના વહીવટી વર્તુળોમાં ભારે ખળભળાટ મચાવી દીધો છે.

​૨૭ લાખનો નાસ્તો, ૧૨ લાખનું પાણી અને ૨૨ લાખની ડ્રોન વિડિયોગ્રાફી!
​જંગલેશ્વરમાં હાથ ધરાયેલી આ ડિમોલિશન કામગીરી દરમિયાન તંત્ર દ્વારા રજૂ કરવામાં આવેલા નાણાકીય બિલો સામે આવતા જ વિરોધનો વંટોળ ઊભો થયો હતો. ડિમોલિશનના માત્ર ૩ દિવસના સમયગાળા દરમિયાન અધિકારીઓ અને કર્મચારીઓ માટે:

​૨૭ લાખ રૂપિયા: ખાણી-પીણી અને કાજુકતરી સહિતના નાસ્તાનું બિલ,
​૧૨.૪૦ લાખ રૂપિયા: મિનરલ વોટરની બોટલોનો ખર્ચ (જેમાં ૨ રૂપિયાની બોટલના ૮ રૂપિયા વસૂલાયાનો આક્ષેપ),
​૬.૭૦ લાખ રૂપિયા: મંડપ અને શેડ વ્યવસ્થાનો ખર્ચ,
​૨૨ લાખ રૂપિયા: ડ્રોન શૂટિંગ અને વિડિયોગ્રાફીનો ખર્ચ,
​સાથે જે-તે વિસ્તારમાં માત્ર ૧૦ કિમીની આવન-જાવનમાં લાખો રૂપિયાના પરિવહન ખર્ચ દર્શાવવામાં આવ્યા હતા. સમગ્ર કામગીરીનો કુલ ખર્ચ રૂ. ૧.૫૦ કરોડથી ૩ કરોડ સુધી પહોંચી જતાં વિરોધ પક્ષ કોંગ્રેસ તેમજ સામાજિક આગેવાનો દ્વારા ભારે હોબાળો મચાવવામાં આવ્યો હતો.

​વહીવટી નિયમોના ધજાગરા: સ્ટેન્ડિંગ કમિટી વગર જ બારોબાર ચુકવણી
​સામાન્ય વહીવટી નિયમ મુજબ મોટો નાણાકીય વ્યવહાર કરતી વખતે મનપાની સ્ટેન્ડિંગ કમિટી (Standing Committee) સમક્ષ દરખાસ્ત મૂકી સત્તાવાર મંજૂરી મેળવવી અનિવાર્ય હોય છે. જોકે, આ કિસ્સામાં કેટલાક ઉચ્ચ અધિકારીઓ અને રેટ કોન્ટ્રાક્ટરોની મિલીભગતથી સ્ટેન્ડિંગ કમિટીની મંજૂરી મેળવ્યા વિના જ બારોબાર ભંડોળ મુક્ત કરી દેવામાં આવ્યું હોવાનું સામે આવ્યું હતું. મનપાના જનરલ બોર્ડમાં પણ કોંગ્રેસના કોર્પોરેટરોએ કાજુકતરીના બોક્સ અને બેનરો સાથે ઉગ્ર વિરોધ નોંધાવ્યો હતો.

​તપાસ પૂર્ણ, હવે કડક કાર્યવાહી પર સૌની નજર
​સમગ્ર મામલો મીડિયા અને સોશિયલ મીડિયામાં ગાજતાં ઉચ્ચ કક્ષાએથી તપાસના આદેશો આપવામાં આવ્યા હતા. વિજીલન્સ અને તપાસ ટીમ દ્વારા તમામ ડિપાર્ટમેન્ટના બિલો, કોન્ટ્રાક્ટરોના કાગળો અને અધિકારીઓની ભૂમિકાની બારીકાઈથી તપાસ કરવામાં આવી છે. તપાસ પૂર્ણ થતાં હવે આ અહેવાલના આધારે ભ્રષ્ટાચાર આચરનારા કે નિયમો નેવે મૂકનારા જવાબદાર અધિકારીઓ અને કોન્ટ્રાક્ટરો સામે શું કડક પગલાં લેવાય છે તેના પર રાજકોટવાસીઓની નજર મંડાયેલી છે.