રાજકોટ, તા. ૧૫: રંગીલા રાજકોટમાં હવામાનના મિજાજમાં અચાનક મોટો પલટો આવ્‍યો હોય તેમ બપોરના સમયે અસહ્ય ગરમી અને કાળઝાળ તાપનો પ્રકોપ જોવા મળ્‍યો હતો. બપોરે બરાબર ૨:૩૦ વાગ્‍યાના સુમારે રાજકોટ શહેરનું તાપમાન ૪૦ ડિગ્રી સેલ્‍સિયસની સપાટીએ પહોંચી જતાં આખું શહેર જાણે ભઠ્ઠીની જેમ શેકાઈ ગયું હતું. આકાશમાંથી સીધા વરસતા અગનગોળા અને ગરમ લૂ-ના પવનોને કારણે નગરજનો અસહ્ય શેકાટ અને બળતરાનો અનુભવ કરી રહ્યા છે. બપોરે માર્ગો પર કરફયુ જેવો માહોલ સામાન્‍ય રીતે ધમધમતા રહેતા રાજકોટના મુખ્‍ય માર્ગો જેવા કે યાજ્ઞિક રોડ, ૧૫૦ ફીટ રિંગ રોડ અને કાલવડ રોડ પર બપોરે ૨:૩૦ વાગ્‍યાના સુમારે વાહનોની અવરજવર નહિવત જોવા મળી હતી.  આકાશમાંથી વરસતી કાળઝાળ ગરમીના કારણે લોકો ઘર કે ઓફિસમાંથી બહાર નીકળવાનું ટાળી રહ્યા છે, જેના કારણે માર્ગો પર અઘોષિત કરફયુ જેવો સનાટો છવાઈ ગયો હતો.

રાહત મેળવવા લોકોના ધમપછાડા

જે લોકોને અનિવાર્ય કામકાજ અર્થે બહાર નીકળવું પડ્‍યું હતું તેઓ ગરમીથી બચવા માટે મોઢે કાપડ કે રૂમાલ બાંધીને, કાળા ચશ્‍મા અને છત્રીનો સહારો લેતા નજરે પડ્‍યા હતા. ગરમીના તીવ્ર પ્રકોપથી રાહત મેળવવા માટે લોકો લીંબુ સરબત, નાળિયેર પાણી, આઇસક્રીમ અને લસ્‍સી જેવા ઠંડા પીણાંના સ્‍ટોલ પર ભીડ જમાવતા જોવા મળ્‍યા હતા.

તાપમાનમાં અચાનક થયેલા આ વધારાને પગલે તબીબોએ પણ નાગરિકોને બપોરના સમયે બિનજરૂરી બહાર ન નીકળવા અને ડીહાઇડ્રેશનથી બચવા પુષ્‍કળ પ્રમાણમાં પાણી, છાશ અને પ્રવાહી પદાર્થોનું સેવન કરવાની સલાહ આપી છે. કાળઝાળ તાપના કારણે લૂ લાગવા (હીટ સ્‍ટ્રોક) ના કિસ્‍સાઓ વધવાની શકયતાને ધ્‍યાને રાખીને વળદ્ધો અને બાળકોને ખાસ સંભાળ રાખવા જણાવાયું છે.