રાજકોટ,તા.૩: દિવાળીના તહેવારને માંડ ગણતરીના દિવસો બાકી રહ્યા છે તેવા સમયે હજુ મોટા ભાગની બેંકોમાં નવી નોટો નહીં આવતાં ગ્રાહકો ઉપરાંત બેંકરોમાં પણ ગણગણાટ શરૂ થયો છે. એકાદ-બે બેંકમાં રિઝર્વ બેંક દ્વારા નવી નોટો મોકલવામાં આવી હોવાનું જાણવા મળે છે. બીજી તરફ કાળાબજારીયાઓ નવી નોટોના બંડલનું મનફાવે તે રીતે ઓનમાં વેચાણ કરી રહ્યાનું બહાર આવ્‍યું છે.

દિવાળી પર્વે નવી કડકડતી નોટો મેળવવાની દાયકાઓ જૂની પરંપરા રહી છે. લક્ષ્મીપૂજન, ચોપડા પૂજન, બેસતા વર્ષે બાળકો-સ્‍નેહીઓને અપાતી બોણી તેમજ વેપારીઓ દ્વારા કર્મચારીઓને અપાતા શુકનમાં કડકડતી ચલણી નોટો વહેંચવી સામાજિક પ્રતિષ્ઠા ગણાય છે. આજે યુપીઆઈ અને ક્‍યૂઆર કોડ આધારિત ડિજિટલ પેમેન્‍ટનું ચલણ સર્વોચ્‍ચ સપાટીએ પહોંચ્‍યું હોવા છતાં,

શુકનના પરબિડીયા માટે રોકડની ડિમાન્‍ડમાં સહેજ પણ ઓટ આવી નથી. વેપારી-ઉદ્યોગકારોથી માંડી સામાન્‍ય નાગરિકો સુધીના તમામ વર્ગો દ્વારા નવી નોટો મેળવવા દોડધામ થઈ રહી છે, પરંતુ વર્ષોવર્ષ રિઝર્વ બેંક દ્વારા બજારમાં નવી નોટો મોકલવાનું પ્રમાણ ઘટાડવામાં આવી રહ્યાની વ્‍યાપક છાપ છે.

નવી નોટો બજારમાં નહીં આવતાં કાળાબજારીયા તત્‍વો તુરંત સક્રિય થઈ ગયા છે. દિલ્‍હી ચકલા, માણેકચોક અને ગાંધી રોડ જેવા શહેરના મુખ્‍ય વ્‍યાપારી વિસ્‍તારોમાં ખુલ્‍લેઆમ કમિશનથી નોટોના સોદા પડી રહ્યા છે. નવી દસની નોટના બંડલના રૂ.૪૦૦થી ૬૦૦, વીસની નોટના બંડલના રૂ.૩૦૦થી ૩૫૦ અને સો રૂપિયાની નવી નોટના બંડલના રૂ.૨૫૦થી ૩૦૦ ઓન બોલાઈ રહ્યા છે. દસ રૂપિયાની નોટની મૂળ કિમત રૂ.૧,૦૦૦ સામે રૂ.૬૦૦ સુધીનું તોતિગ કમિશન ચૂકવવા છતાં જરૂરિયાતમંદો કાળાબજારીયા પાસેથી બંડલો લેવા જતાં ત્‍યાં પણ માલ ખૂટી પડયો હોવાનું અને 'એકાદ-બે દિવસમાં નવો સ્‍ટોક આવશે' તેવા જવાબો મળી રહ્યા છે.

સામાન્‍ય રીતે રિઝર્વ બેંક દ્વારા દીપાવલી પર્વના ૧૦-૧૨ દિવસ પૂર્વે નવી નોટોની ફાળવણી કરી દેવામાં આવતી હોય છે અને તહેવારના સપ્તાહ પૂર્વે બેંકો દ્વારા કાઉન્‍ટર પરથી ચાહકોને વિતરણ શરૂ કરી દેવાતું હોય છે. પરંતુ આ વર્ષે એકાદ-બે બેંકોને બાદ કરતાં મોટા ભાગની કરન્‍સી ચેસ્‍ટ ધરાવતી શાખાઓ હજુ ખાલીખમ છે. બીજી તરફ, દસની નોટોની અછત સામે રિઝર્વ બેંક દ્વારા ૧૦ રૂપિયાના સિક્કા પધરાવવામાં આવશે તેવું ચર્ચાઈ રહ્યું છે. જોકે બજારમાં હજુ પણ વેપારીઓ ૧૦ના સિક્કા સ્‍વીકારવામાં આનાકાની કરતા હોય છે, ઉપરાંત દિવાળીના શુકનના કવરમાં વજનદાર સિક્કો મૂકવો વ્‍યવહારુ ન ગણાતો હોવાથી લોકોમાં આ વિકલ્‍પ સામે ભારે નારાજગી જોવા મળી રહી છે.