રાજકોટમાં દિવાળીના તહેવારને ધ્યાનમાં રાખીને ફટાકડાના વેચાણ અંગે પોલીસ કમિશનર દ્વારા જાહેરનામું બહાર પાડવામાં આવ્યું છે. ફટાકડાના વેપારીઓ માટે ખાસ સૂચનાઓ જાહેર કરીને સુપ્રીમ કોર્ટની ગાઇડલાઇન મુજબ જ ફટાકડાનું વેચાણ કરવા આદેશ આપવામાં આવ્યો છે. જાહેરનામા મુજબ, માત્ર લાઇસન્સ ધરાવતા વેપારીઓ જ ફટાકડાનું વેચાણ કરી શકશે અને નિયમોનું ઉલ્લંઘન કરનાર સામે ગુનો નોંધવામાં આવશે. આ ઉપરાંત ભારે ઘોંઘાટ કરતા ફટાકડા અને સિરીઝવાળા ફટાકડાના વેચાણ તથા ઉપયોગ પર સંપૂર્ણ પ્રતિબંધ મૂકવામાં આવ્યો છે. પોલીસ દ્વારા વેપારીઓને જાહેરનામાનું ચુસ્તપણે પાલન કરવા સૂચના આપવામાં આવી છે. આ જાહેરનામું 29 ઓક્ટોબરથી 25 નવેમ્બર સુધી અમલી રહેશે. તહેવાર દરમિયાન ધ્વનિ પ્રદૂષણ નિયંત્રિત કરવા અને જાહેર સલામતી જાળવવાના હેતુથી આ કાર્યવાહી કરવામાં આવી છે.