રાજકોટ, તા.,૩૧ : મહાનગરપાલિકાના વેરા વિભાગના ચોપડે શહેરમાં આજની સ્‍થિતિએ કુલ ૬,૧૦,૯૩૧ મિલકતો નોંધાયેલી હોવાનું જાણવા મળ્‍યું છે. તંત્રના સૂત્રોના જણાવ્‍યા મુજબ આ મિલકતો સામે મિલકત વેરો અને પાણી વેરા સહિતની કુલ રૂ. ૧,૪૦૩.૯૬ કરોડની માંગણી બાકી છે. આ આંકડો મહાનગરપાલિકા માટે વેરા વસૂલાતના પડકારને ઉજાગર કરે છે. મળતી વિગતો મુજબ કુલ બાકી માંગણીમાંથી રૂ. ૪૨૩.૨૯ કરોડ માત્ર વ્‍યાજના સ્‍વરૂપે છે. તેમાં પણ પાણી વેરાના વ્‍યાજની રકમ રૂ. ૨૧૩.૬૦ કરોડ સુધી પહોંચી હોવાનું સૂત્રોએ જણાવ્‍યું છે. આ પરથી લાંબા સમયથી બાકી રહેલી વેરાની રકમ પર વ્‍યાજનો બોજ સતત વધતો ગયો હોવાનું માનવામાં આવે છે. રાજકોટ મહાનગરપાલિકાની આવકમાં મિલકત વેરો અને પાણી વેરો મુખ્‍યસ્ત્રોતોમાં સામેલ છે. આ આવકમાંથી શહેરમાં રસ્‍તા, પાણી પુરવઠો, ગટર, સફાઈ, સ્‍ટ્રીટ લાઇટ સહિતના વિવિધ વિકાસ અને જાળવણીના કાર્યો હાથ ધરવામાં આવે છે. જોકે હજારો કરોડની બાકી માંગણીને કારણે મહાનગરપાલિકાની આવક પર નોંધપાત્ર અસર થવાની સંભાવના વ્‍યક્‍ત કરવામાં આવી રહી છે. સૂત્રોના જણાવ્‍યા મુજબ બાકી વેરાની વસૂલાત માટે મહાનગરપાલિકા દ્વારા વિવિધ તબક્કે નોટિસો, વસૂલાત અભિયાન અને અન્‍ય કાર્યવાહીઓ હાથ ધરવામાં આવતી રહી છે. તેમ છતાં બાકી માંગણીનો આંક હજુ પણ ઊંચો હોવાનું સામે આવ્‍યું છે. આગામી સમયમાં મોટા બાકીદારો સામે વધુ કડક વસૂલાતી કાર્યવાહી હાથ ધરવામાં આવે તેવી ચર્ચા પણ તંત્રમાં ચાલી રહી હોવાનું જાણવા મળે છે. આ અંગે મહાનગરપાલિકાના જવાબદાર અધિકારીઓનો સત્તાવાર પ્રતિભાવ મેળવવાના પ્રયાસો હાથ ધરવામાં આવ્‍યા હતા. તેમનો પ્રતિભાવ મળશે તો તેને પણ અગ્રતા સાથે પ્રકાશિત કરવામાં આવશે