રાજકોટ: જન્માષ્ટમીના પાવન પર્વે રાજકોટ લોકમેળા અમલીકરણ સમિતિ દ્વારા યોજાતો રાજકોટનો લોકમેળો વિશ્વભરમાં જાણીતો છે. વહીવટી તંત્ર દ્વારા આગામી ૨ થી ૬ સપ્ટેમ્બર ૨૦૨૬ દરમિયાન રેસકોર્સના મેદાનમાં પરંપરાગત લોકમેળાનું આયોજન કરવામાં આવ્યું છે, જેની તૈયારીઓનો ધમધમાટ શરૂ થઈ ચૂક્યો છે અને મેળાના ફોર્મનું વિતરણ પણ શરૂ થઈ ગયું છે. લોકમેળાને દર વર્ષની જેમ આકર્ષક નામ આપવાની પ્રથાને અનુસરીને આ વર્ષે પણ નગરજનો પાસેથી નામકરણ માટે ગત ૬ જુલાઈથી ૨૨ જુલાઈ દરમિયાન શિષ્ટ અને આકર્ષક શીર્ષકો મંગાવવામાં આવ્યા છે.

લોકમેળાના નામકરણ પ્રસ્તાવને રાજકોટવાસીઓ તરફથી અભૂતપૂર્વ પ્રતિસાદ મળી રહ્યો છે. તા. ૨૧ જુલાઈની સાંજ સુધીમાં ૪૦૦૦ જેટલી એન્ટ્રીઓ આવી ચૂકી છે. આ સ્પર્ધામાં ભાગ લેવા ઈચ્છુક નગરજનો માટે આવતીકાલે તા. ૨૨ જુલાઈના રોજ અંતિમ દિવસ હોય, જોડાવા માટેની આ છેલ્લી તક છે.

સ્પર્ધકોએ પોતાનું સૂચિત નામ ગૂગલ ફોર્મ લિંક (https://forms.gle/baqQAMDrrHhsN2p6A) અથવા આપેલા ક્યુઆર કોડને સ્કેન કરીને મોકલવાનું રહેશે. આ લિંક પ્રાદેશિક માહિતી કચેરી - રાજકોટના અધિકૃત ફેસબુક પેજ 'Info Rajkot GoG', ઈન્સ્ટાગ્રામ એકાઉન્ટ 'inforajkotgog' અને એક્સ એકાઉન્ટ 'Info Rajkot GoG' પરથી પણ મેળવી શકાશે.

નામકરણ સ્પર્ધા માટેના નિયમો અનુસાર, આપેલું સૂચન ટૂંકું, આકર્ષક, શિષ્ટ, મનોગમ્ય તથા સૌરાષ્ટ્રની ભાતીગળ સંસ્કૃતિ, રહેણી-કરણી અને લોકજીવનને અનુરૂપ હોવું જરૂરી છે. દરેક સ્પર્ધક માત્ર એક જ શીર્ષક સૂચવી શકશે. ગૂગલ ફોર્મમાં લોકમેળાના ફક્ત એક નામ સાથે સ્પર્ધકે પોતાનું પૂરું નામ, સરનામું અને મોબાઈલ નંબર ખાસ દર્શાવવાના રહેશે. તા. ૨૨ જુલાઈની સમયમર્યાદા પૂરી થયા બાદ આવેલી એન્ટ્રીઓને પસંદગી માટે ધ્યાને લેવામાં આવશે નહીં. પ્રાપ્ત થયેલી તમામ એન્ટ્રીઓમાંથી લોકમેળા સમિતિ દ્વારા આખરી શીર્ષકની પસંદગી કરવામાં આવશે અને આ અંગે સમિતિનો નિર્ણય આખરી ગણાશે. વિજેતા જાહેર થનાર સ્પર્ધકને યોગ્ય પુરસ્કાર આપીને સન્માનિત કરવામાં આવશે.