પશ્ચિમ રેલવેના ભાવનગર મંડળ દ્વારા દૈનિક ધોરણે મુસાફરી કરતા પેસેન્જરો માટે એક અત્યંત રાહતજનક નિર્ણય લેવામાં આવ્યો છે. સૌરાષ્ટ્રના સૌથી વ્યસ્ત અને મહત્વના ગણાતા વેરાવળ–રાજકોટ રૂટ પર મુસાફરોની સતત વધતી ભીડ અને બેઠક સુવિધાની માંગને ધ્યાનમાં રાખીને રેલવે તંત્ર દ્વારા ટ્રેન નંબર 59422/59421 વેરાવળ–રાજકોટ દૈનિક પેસેન્જર ટ્રેનમાં 2 વધારાના જનરલ કોચ જોડવાની જાહેરાત કરવામાં આવી છે.

આ રૂટ પર દરરોજ નોકરીયાતો, વિદ્યાર્થીઓ, વેપારીઓ તેમજ યાત્રાળુઓ મોટી સંખ્યામાં મુસાફરી કરતા હોય છે. પીક અવર્સ દરમિયાન જનરલ કોચમાં ભારે ભીડ જોવા મળતી હતી. રેલવેના આ નિર્ણયથી મુસાફરોને હવે સીટ મેળવવામાં આસાની રહેશે અને ધક્કામુક્કીમાંથી મોટી રાહત મળશે.

ભાવનગર મંડળના વરિષ્ઠ મંડળ વાણિજ્ય પ્રબંધક  અતુલ કુમાર ત્રિપાઠીએ આ અંગેની વિગતવાર માહિતી આપતા જણાવ્યું હતું કે, આ 2 વધારાના જનરલ કોચ ઉમેરાયા બાદ ટ્રેનમાં સામાન્ય જનરલ કોચની કુલ સંખ્યા વધીને 11 થઈ જશે. આ ઉપરાંત, ટ્રેનમાં અગાઉથી કાર્યરત 2 એસએલઆરડી (SLRD - ગાર્ડ અને દિવ્યાંગ કોચ) સહિત આખી ટ્રેનની કુલ કોચ ક્ષમતા 11થી વધીને 13 કોચની થઈ જશે.

રાજકોટથી ઉપડતી ટ્રેન માટે: 1 નવેમ્બર, 2026 થી 31 જાન્યુઆરી, 2027 સુધી આ વધારાના કોચ ઉપલબ્ધ રહેશે.

વેરાવળથી ઉપડતી ટ્રેન માટે: 2 નવેમ્બર, 2026 થી 1 ફેબ્રુઆરી, 2027 સુધી આ 2 વધારાના કોચ સેવામાં રહેશે.

મંડળ રેલવે પ્રબંધક (DRM) દિનેશ વર્માએ સૌરાષ્ટ્રના તમામ મુસાફરોને રેલવે દ્વારા પૂરી પાડવામાં આવેલી આ વધારાની સુવિધાનો વધુમાં વધુ લાભ લેવા અનુરોધ કર્યો છે. તેમણે ઉમેર્યું હતું કે પશ્ચિમ રેલવે અને ભાવનગર મંડળ પોતાના પેસેન્જરોને વધુ સુવિધાયુક્ત, સલામત અને આરામદાયક મુસાફરીનો અનુભવ આપવા માટે સતત કટિબદ્ધ છે.