(વિનોદ ગાલા દ્વારા) ભુજ : કચ્છના અત્યંત સંવેદનશીલ ગણાતા સીરક્રીક વિસ્તારમાંથી સુરક્ષા એજન્સીઓ દ્વારા ચાર પાકિસ્તાની માછીમારોને એક બોટ સાથે ઝડપી પાડવામાં આવ્યા હોવાની મહત્વની ઘટના સામે આવી છે. ઇન્ટરનેશનલ મરીન બોર્ડર નજીક પેટ્રોલિંગની કામગીરી ચાલી રહી હતી તે દરમિયાન મળેલી ચોક્કસ બાતમીના આધારે બોર્ડર સિક્યુરિટી ફોર્સ (બીએસએફ) ના જવાનોએ આ સફળ કાર્યવાહી કરી હતી.

પ્રાપ્ત વિગતો અનુસાર, પકડાયેલા પાકિસ્તાની શખ્સો ગેરકાયદેસર રીતે ભારતીય જળસીમામાં પ્રવેશ કરીને કરચલા પકડવાની પ્રવૃત્તિમાં સંડોવાયેલા હતા. બીએસએફના જવાનોએ ત્વરિત કાર્યવાહી કરીને તેમને બોટ સહિત દબોચી લીધા હતા.

પકડાયેલા તમામ માછીમારોની પ્રાથમિક પૂછપરછ કર્યા બાદ તેમને આગળની કાયદેસરની કાર્યવાહી માટે સ્થાનિક પોલીસને સોંપવામાં આવ્યા છે. ત્યારબાદ વિવિધ સુરક્ષા અને ગુપ્તચર એજન્સીઓ દ્વારા સઘન તથા સંયુક્ત પૂછપરછ હાથ ધરવા માટે તેમને ભૂજ સ્થિત જેઆઈસી જેલ ખાતે ખસેડવામાં આવ્યા છે, જ્યાં તેમના પ્રવેશન પાછળના હેતુ અને અન્ય વિગતો અંગે ઊંડાણપૂર્વક તપાસ કરવામાં આવશે.