(અરવિંદ નિર્મળ દ્વારા) અમરેલી તા.૮ : ગુજરાતમાં સામાજિક માધ્યમો અને ડિજિટલ માધ્યમ મારફતે ટૂંકા ગાળામાં અસાધારણ વળતરની લાલચ આપી લાખો લોકો સાથે છેતરપિંડી આચરનારી ટોળકીનો અમરેલી સાયબર ગુના શાખાએ પર્દાફાશ કર્યો છે.એસડી પે અને અપના પે નામની મોબાઇલ એપ્લિકેશન મારફતે આચરાયેલા અંદાજે ૬૩૪ કરોડ રૂપિયાના મહાકૌભાંડમાં વિશેષ તપાસ ટુકડીએ ૬ આરોપીઓની ધરપકડ કરી છે.

આ મામલે અમરેલી સાયબર ગુના પોલીસ મથક ખાતે ભાગ-એ ગુના રજીસ્ટર નંબર ૧૧૧૯૩૦૩૨૨૬૦૦૦૫/૨૦૨૬ તા. ૦૨/૦૮/૨૦૨૬ ના રોજ સાંજે ૫.૦૧ કલાકે ગુનો નોંધાયો છે. પોલીસે ભારતીય ન્યાય સંહિતા કલમ ૩૧૮(૪), ૩૧૯(૨), અનિયંત્રિત થાપણ યોજના પ્રતિબંધ અધિનિયમ, નાણાકીય સંસ્થાઓમાં થાપણદારોના હિત રક્ષણ અધિનિયમ, ઇનામી ચિઠ્ઠી અને નાણા પરિભ્રમણ યોજના પ્રતિબંધ અધિનિયમ અને માહિતી પ્રૌદ્યોગિકી અધિનિયમ કલમ ૬૬(ડી) હેઠળ ગુનો નોંધી પોલીસ અધિક્ષક અમરેલી દ્વારા મદદનીશ પોલીસ અધિક્ષક જયવીર ગઢવીના નેતૃત્વ હેઠળ વિશેષ તપાસ ટુકડીની રચના કરી હતી. ત્યારબાદ તા. ૦૩/૦૮/૨૦૨૬ અને ૦૯/૦૮/૨૦૨૬ ના રોજ ૬ આરોપીઓની ધરપકડ કરવામાં આવી છે.

આરોપીઓએ લોકો પાસે રૂપિયા ૧,૦૦૦ થી ૫ લાખ સુધીનું રોકાણ કરાવી રોજનું ૦.૧૫ ટકા થી ૦.૩૦ ટકા વળતર આપવાની લાલચ આપી હતી.રૂપિયા ૧,૦૦૦ થી ૨૫,૦૦૦ પર ૦.૧૫ ટકા રોજનું વળતર,રૂપિયા ૨૫,૦૦૦ થી ૧ લાખ પર ૦.૨૦ ટકા રોજનું વળતર,રૂપિયા ૧ લાખ થી ૫ લાખ પર ૦.૨૫ ટકા રોજનું વળતર,રૂપિયા ૫ લાખથી વધુ પર ૦.૩૦ ટકા રોજનું વળતર.

ઉપરાંત ૧૫ સ્તર સુધી ૩ ટકા થી ૩૦ ટકા સુધીના ભલામણ બોનસની લાલચ આપી હતી. તપાસમાં સામે આવ્યું કે આરોપીએ પહેલા સ્તરમાં ૨૭૧ લોકોને જોડ્યા હતા અને ત્યારબાદ તેમની નીચે અલગ અલગ સ્તરમાં અંદાજે દોઢ થી પોણા બે લાખ લોકોને જોડીને રોકાણ કરાવ્યું હતું. એપ્લિકેશન ભંડાર પર આ એપના ૧૦ લાખથી વધુ વપરાશકર્તા હોવાનું પણ સામે આવ્યું છે.

           નાણા મેળવવા અને સગેવગે કરવા માટે આરોપીઓએ ૭ કંપનીઓ ઉભી કરી હતી.૧. એસ.ડી. હબ (ઓપીસી) પ્રાઇવેટ લિમિટેડ,૨. શિવ ધરતી કોમ્યુનિકેશન પ્રાઇવેટ લિમિટેડ,૩. શિવધરતી ટેકનોલોજી પ્રાઇવેટ લિમિટેડ,૪. યુપે ડિજી પેમેન્ટ ઇન્ડિયા લિમિટેડ,૫. યુપે ડિજી ઇન્ડિયા પ્રાઇવેટ લિમિટેડ,૬. યુ પેમેન્ટ ઇન્ડિયા લિમિટેડ,૭. હસ્ટલનેસ્ટ પ્રાઇવેટ લિમિટેડ.

આ કંપનીઓના નામે અલગ અલગ બેંકમાં ૧૫ જેટલા બેંક ખાતા ખોલી તેમાં ૬૩૪ કરોડ રૂપિયા જમા કરાવ્યા હતા. આ ઉપરાંત આરોપીઓના અંગત ૩૦ થી ૩૫ બેંક ખાતા પણ મળી આવ્યા છે.

રાષ્ટ્રીય સાયબર ગુના નોંધણી પોર્ટલ પર તપાસ કરતા આ પૈકીના ૧૨ બેંક ખાતાઓ વિરુદ્ધ ૮૩ સાયબર છેતરપિંડીની ફરિયાદો મળી આવી છે, જેમાં છેતરપિંડીની રકમ રૂપિયા ૨૩,૦૮,૭૩,૫૬૭ અને વિવાદિત રકમ રૂપિયા ૭૬,૮૪,૯૨૬ હોવાનું ખુલ્યું છે.

      ઝડપાયેલા આશિષ છગનભાઈ ગેડીયા (૩૮) - ધંધો-વેપાર, રહે. સુરત (કતારગામ), મૂળ વાંગોટા, તા. સાવરકુંડલા, જિ. અમરેલી,ભાવેશ ધીરૂભાઈ ચૌહાણ (૪૧) - ધંધો-વેપાર, રહે. સુરત, મૂળ સાવરકુંડલા,નીશી સત્યનારાયણ પ્રસાદ (૪૯) - રહે. મહેસાણા, મૂળ બિહાર (શિવાન),સોહિલભાઈ જીતેન્દ્રકુમાર મકવાણા (૨૬) - ખાનગી નોકરી, રહે. મહેસાણા,નિરવ અરવિંદભાઈ પટેલ (૩૨) - ખાનગી નોકરી, રહે. પ્રતાપનગર, બલોલ, જિ. મહેસાણા,સૂર્યસિંહ જગતસિંહ રાઠોડ (૨૪) - ધંધો-ખેતી, રહે. ખડાત (મહુડી), તા. માણસા, જિ. ગાંધીનગર - આ એસ.ડી. હબ કંપનીનો નિયામકની પૂછપરછ હાથ ધરવામાં આવી છે.

પોલીસે જણાવ્યું કે આ કૌભાંડમાં હજુ વધુ કંપનીઓ અને બેંક ખાતાઓની તપાસ ચાલુ છે અને વધુ આરોપીઓની સંડોવણી ખુલવાની શક્યતા છે.