News of Friday, 10th May 2024
મોરબીના દલવાડી સર્કલ પાસે પ્રધાનમંત્રી આવાસ યોજનામાં પાણીનો પોકાર
૧૨ દિવસથી પાણી ન આવતું હોઇ રહીશોએ પાલિકા કચેરીમાં કર્યા સૂત્રોચ્ચાર, રામધૂન બોલાવી

(પ્રવિણ વ્યાસ દ્વારા) મોરબી, તા.૧૦: ઉનાળાની ગરમીમાં સરકાર લોકોને કામ વગર બહાર ન નીકળવાની સલાહ આપે છે પણ ઘરમાં પીવાનું પાણી જ ન આવતું હોય તો લોકોને રસ્તા પર આવવુ પડે છે. આવી જ કંઇક હાલત મોરબીમાં દલવાડી સર્કલ પાસે આવેલી પ્રધાનમંત્રી આવાસ યોજનાનાં રહીસોની છે.
સ્થાનિક રહીસોને પીવાના પાણીનું ખૂબ મૂશ્કેલીઓ પડે છે. એક તરફ મચ્છુ ડેમમાં નર્મદાનું પાણી નાંખવામાં આવે છે પણ ઘરમાં લોકોનાં નળમાં પાણી આવતું નથી.પાણીની સમસ્યાથી ત્રસ્ત થયેલા રહીશો નગરપાલિકા ખાતે પહોંચ્યા હતા અને પાણી આપવાની માંગ સાથે ઉગ્ર સૂત્રોચ્ચાર કર્યા હતા.
પાણીના પ્રશ્ને નગરપાલિકા કચેરી ખાતે આવેલા રહીશોએ હાય હાય...ના નારા લગાવ્યા હતા. સ્થાનિક રહીશો સાથે રજૂઆત કરવા પહોંચેલા સામાજિક કાર્યકર રાજુભાઈ દવેએ જણાવ્યું હતું કે, આવાસ યોજનામાં છેલ્લા ૧૨ દિવસથી પાણી આવ્યું નથી. જ્યાં સુધી પાણી નહીં આપે ત્યાં સુધી કોઈપણ રહીશો પાલિકા કચેરીમાંથી જવાના નથી. પ્રધાનમંત્રી આવાસ યોજનાના રહીશોએ જણાવ્યું કે, આ કાળઝાળ ગરમીમાં પાણી વિના કેમ ચાલે? લાઈન તૂટી ગઈ હોવાનું બહાનું આપવામાં આવી રહ્યું છે. પરંતુ એક-બે દિવસ હોય તો સમજ્યા પણ આ તો ૧૨-૧૨ દિવસથી પાણી આપવામાં નથી આવતું. પાણી વિના નાના બાળકોને ખૂબ તકલીફ પડી રહી છે.
જો કે, રજૂઆત કરવા પહોંચેલા રહીશોની વાત સાંભળવા પાલિકામાં કોઈ ન હોય તેવા દ્રશ્યો પણ જોવા મળ્યા હતા તેથી રહીશોએ કચેરીમાં જ બેસીને રામધૂન બોલાવી હતી અને પોતાનો વિરોધ નોંધાવ્યો હતો.
(12:48 PM IST)









છેલ્લા 8 દિવસમાં સૌથી લોકપ્રિય 
