જામનગર,તા.૨૪

જામનગરમાં વોર્ડ નંબર ૧૨ના કોર્પોરેટર અસલમી ખીલજી અને ફેમિદાબેન જુણેજાને આગામી છ વર્ષ માટે કોંગ્રેસમાંથી સસ્પેન્ડ કરવામાં આવ્યાં છે. પક્ષના કાર્યક્રમમાં હાજરી નહીં આપવા તેમજ પક્ષમાં સહકાર ન આપવા બદલ સસ્પેન્ડ કરવામાં આવ્યાં હોવાનું જાણવા મળ્યું છે. વિરોધ પક્ષ કાર્યાલયમાંથી શહેર કોંગ્રેસ પ્રમુખ દિગુભા જાડેજા અને વિરોધ પક્ષના નેતા ધવલ નંદા સહિતના કોર્પોરેટરોની ઉપસ્થિતિમાં પત્રકાર પરિષદમાં જાહેર કરવામાં આવ્યું હતું કે, ગુજરાત પ્રદેશ કોંગ્રેસ સમિતિના પ્રમુખ શક્તિસિંહ ગોહિલની સુચનાનુસાર કોંગ્રેસમાં રહી અશિસ્ત ભર્યું વર્તન કરી કોંગ્રેસને નુકસાન કર્યું હોવાથી બંનેને કોંગ્રેસ પક્ષમાંથી છ (૬) વર્ષ માટે સસ્પેન્ડ કરવામાં આવે છે.

વોર્ડ નંબર ૧૨ ના કોર્પોરેટર અસલમ ખીલજી અને ફેમિદાબેન જુણેજાને વારંવાર પક્ષના કાર્યક્રમમાં હાજરી નહીં આપવા અને કોંગ્રેસ કાર્યાલયમાં અનેક વખત બોલાવવા છતાં કે કાર્યક્રમમાં હાજરી નહીં આપવા બદલ અને આ બાબતે પક્ષનું અપમાન કર્યા હોવાનું શહેર કોંગ્રેસ પ્રમુખ દ્વારા જણાવવામાં આવ્યું હતું. જામનગર મહાનગર પાલિકાના કોંગ્રેસના વોર્ડ નંબર ૧૨ના બે કોર્પોરેટરોને ૬ વર્ષ માટે સસ્પેન્ડ કર્યા છે. જેમાં અસલમ ખિલજી અને ફેમીદાબેન રિઝવાન જુણેજાને સસ્પેન્ડ કરવામાં આવે છે. કોંગ્રેસ પક્ષમાં સહકાર ન આપવા બદલ સસ્પેન્ડ કરવામાં આવ્યા છે. પક્ષની એક પણ મિટીંગમાં બને નગરસેવક ઘણા સમયથી હાજર રહેતા ન હતા. શહેર કોંગ્રેસ પ્રમુખની પ્રદેશમાં રજૂઆત કર્યા બાદ આજરોજ કોંગ્રેસ પ્રદેશ મોવડી મંડળ દ્વારા નિર્ણય લેવામાં આવ્યો છે. વોર્ડ નંબર ૧૨ ના કોંગ્રેસના બંને કોર્પોરેટરને છ વર્ષ માટે સસ્પેન્ડ કરી દેવામાં આવ્યા છે.