(નરેશ ચોહલીયા દ્વારા) જસદણ તા. ૭ :.. તાલુકાના સાણથલી ગામની સીમમાં છેલ્લા ચારથી પાંચ દિવસથી એક ખૂંખાર દીપડાના આટાફેરા ચાલતા ખેડૂતોમાં ભયનો માહોલ છવાયો હતો. શિયાળુ પાકની મોસમ ચાલી રહી હોવાથી આ દીપડાના લીધે ખેડૂતોના જીવને જોખમ ઊભું થયું હતું.

આ બાબતે વનતંત્રને જાણ કરવામાં આવતાં, તંત્રના જાંબાઝ જવાનોએ તરત જ પગલાં લીધાં હતા. દીપડાના પગેરા શોધીને યોગ્‍ય સ્‍થળે પાંજરું ગોઠવવામાં આવ્‍યું હતું.

 લાંબા પ્રયાસો બાદ આખરે વનતંત્રના કર્મચારીઓએ દીપડાને પાંજરે પુરવામાં સફળતા મેળવી હતી. આ દીપડાને પકડ્‍યા બાદ તેને વનવિભાગના હવાલે સોંપવામાં આવ્‍યો હતો, જેનાથી સાણથલી ગામના ખેડૂતો અને ગ્રામજનોમાં હાશકારો જોવા મળ્‍યો હતો.