તસ્‍વીરમાં કાળમુખુ માલવાહક વાહન, ઠોકરે ચડેલુ બાઇક, કાળનો કોળીયો બનેલા વિજયભાઇ, તેમની દિકરી શ્રધ્‍ધા, ભાણેજ કૃપાલીના ફાઇલ ફોટો તથા કૃપાલીનો નિષ્‍પ્રાણ દેહ જોઇ શકાય છે.

રાજકોટ તા. ૨૪: લાઠીના બાબરા નજીક જામ બરવાળા નજીક ગલકોટડી ખાખરીયા ગામની ચોકડી પાસે  બાઇકને   ગોઝારો અકસ્‍માત સર્જાયો હતો. જેમાં માલવાહક વાહને ટ્રીપલ સવારીવાળા બાઇકને ઉલાળી દેતાં બાઇકચાલક લાઠીના યુવાનનું ઘટના સ્‍થળે જ મોત થયુ હતું. જ્‍યારે તેની દિકરીનું બાબરા હોસ્‍પિટલમાં અને ભાણેજનું રાજકોટ હોસ્‍પિટલમાં મૃત્‍યુ થતાં પરિવારોમાં કલ્‍પાંત સર્જાયો હતો. યુવાન તેની દિકરી અને ભાણેજને લઇને લગ્ન પ્રસંગમાં જવા નીકળ્‍યા ત્‍યારે આ બનાવ બન્‍યો હતો.

પ્રાપ્‍ત માહિતી અનુસાર લાઠીમાં લીમડા હનુમાન શેરીમાં રહેતાં વિજયભાઇ વલ્લભભાઇ પરમાર-નાગડુકીયા (ઉ.વ.૪૦) ગઇકાલે પોતાના બાઇકમાં દિકરી શ્રધ્‍ધા (ઉ.વ.૧૫) અને લાઠી થડાવડ પ્‍લોટમાં રહેતી ભાણેજ કૃપાલી નરેશભાઇ સોલંકી (ઉ.વ.૮)ને બેસાડીને ખાખરીયા ગામે ફઇની દિકરીના લગ્નમાં હાજરી આપવા રવાના થયા હતાં. દરમિયાન ખાખરીયા ચોકડી નજીક પહોંચ્‍યા ત્‍યારે માલવાહક વાહનના ચાલકે બાઇકને ઉલાળી દેતાં ગંભીર ઇજા થતાં વિજયભાઇનું ઘટના સ્‍થળે જ કમકમાટીભર્યુ મોત થયું હતું.

જ્‍યારે તેમની દિકરી શ્રધ્‍ધા વિજયભાઇ પરમાર (ઉ.વ.૧૫)ને વધુ સારવાર માટે બાબરા હોસ્‍પિટલમાં ખસેડાઇ હતી. જ્‍યાં તેણીએ દમ તોડી દીધો હતો. જ્‍યારે ભાણેજ કૃપાલી નરેશભાઇ સોલંકી (ઉ.વ.૮)ને રાજકોટ સિવિલ હોસ્‍પિટલમાં ખસેડાઇ હતી. અહિ સવારે તેણીનું પણ મોત થયુ઼ હતું. હોસ્‍પિટલ ચોકીના રામશીભાઇ, ભાવેશભાઇ, તોૈફિકભાઇ, ધર્મેન્‍દ્રભાઇએ લાઠી પોલીસને જાણ કરી હતી.

મૃત્‍યુ પામનાર વિજયભાઇ પરમાર પાંચ બહેનના એકના એક વચેટ ભાઇ અને પરિવારનો આધારસ્‍તંભ હતાં. તે ખેતી કરી ગુજરાન ચલાવતાં હતાં. તેને સંતાનમાં એક પુત્ર અને ત્રણ પુત્રી છે. બનાવથી ત્રણ સંતાન પિતા વિહોણા થયા છે, જ્‍યારે દિકરીનું તેમની સાથે જ મૃત્‍યુ થયું છે. આ દિકરી શ્રધ્‍ધા ધોરણ-૯માં ભણતી હતી.

જ્‍યારે વિજયભાઇની ભાણેજ કૃપાલી ત્રણ ભાઇની એકની એક બહેન હતી. તેના પિતા નરેશભાઇ ધીરૂભાઇ સોલંકી ફ્રુટની લારી કાઢી ગુજરાન ચલાવે છે. આ બનાવથી પરમાર-સોલંકી પરિવારજનોમાં કલ્‍પાંત સર્જાયો છે. પોલીસે માલવાહક વાહનના ચાલક વિરૂધ્‍ધ કાર્યવાહી કરી હતી.