જામનગર: ભારતના રાજકીય ઈતિહાસમાં એક નવું પરિવર્તન લાવવા માટે ‘વન નેશન, વન ઈલેક્શન’ની નીતિને અમલમાં મૂકવાની તૈયારી ચાલી રહી છે. આ અંગે જામનગરમાં જામનગર એડવોકેટ્સ એન્ડ લીગલ એસોસિયેટ્સ દ્વારા એક વિશેષ કાર્યક્રમનું આયોજન કરવામાં આવ્યું હતું, જેમાં શહેરની વિવિધ સંસ્થાઓ, ધાર્મિક સંગઠનો અને વ્યાપારી એસોસિયેશનોએ આ નીતિને ટેકો જાહેર કર્યો. આ કાર્યક્રમમાં સાંસદ પૂનમબેન માડમ, શહેર અધ્યક્ષ બીનાબેન કોઠારી અને મોટિવેશનલ સ્પીકર સંજય રાવલે ઉદ્બોધન કરીને આ ઐતિહાસિક નિર્ણયનું મહત્ત્વ સમજાવ્યું.

ચૂંટણીઓ લોકશાહીનું પર્વ હોવા છતાં, વારંવાર અને અનિયમિત રીતે યોજાતી ચૂંટણીઓથી દેશને મોટું નુકસાન થઈ રહ્યું છે. માનનીય વડાપ્રધાન નરેન્દ્રભાઈ મોદીના નેતૃત્વમાં સરકારે આ મુદ્દે નિરીક્ષણ કર્યું કે લાખો માનવ કલાકો, આચારસંહિતાનો લાંબો સમયગાળો અને ચૂંટણી પાછળ ખર્ચાતા કરોડો રૂપિયા દેશના અર્થતંત્ર અને વિકાસને અવરોધે છે. આને ધ્યાનમાં રાખીને ‘વન નેશન, વન ઈલેક્શન’ની નીતિ લાગુ કરવાનો નિર્ધાર કરાયો છે. આ નીતિના અમલ પહેલાં પ્રજાના મંતવ્યો એકત્ર કરવામાં આવશે અને એક નિષ્પક્ષ સમિતિ દ્વારા તેનું મૂલ્યાંકન થશે.

1951-52થી 1967 સુધી લોકસભા અને રાજ્ય વિધાનસભાની ચૂંટણીઓ મોટાભાગે એકસાથે યોજાતી હતી, પરંતુ ત્યારબાદ આ ચક્ર તૂટી ગયું. હવે દર વર્ષે અને એક જ વર્ષમાં અલગ-અલગ સમયે ચૂંટણીઓ યોજાય છે, જેના કારણે સરકાર, સુરક્ષા દળો અને અધિકારીઓ પર મોટો બોજ પડે છે. આચારસંહિતાના લાંબા ગાળાને કારણે વિકાસ કાર્યો ખોરંભે પડે છે. કાયદા પંચના 170મા અહેવાલમાં પણ આ મુદ્દે ચિંતા વ્યક્ત કરાઈ હતી અને એકસાથે ચૂંટણીઓની જૂની પ્રથા પાછી લાવવાની ભલામણ કરાઈ હતી.

ડિસેમ્બર 2015માં સંસદીય સ્થાયી સમિતિના 79મા અહેવાલમાં એકસાથે ચૂંટણીઓની શક્યતાની તપાસ કરવામાં આવી હતી. સમિતિએ બે તબક્કામાં ચૂંટણીઓ યોજવાની વ્યવહારુ પદ્ધતિની ભલામણ કરી હતી. આ ભલામણોને ધ્યાનમાં રાખીને સરકારે રાષ્ટ્રીય હિતમાં આ નીતિ લાગુ કરવાનું નક્કી કર્યું છે અને એક ઉચ્ચ સ્તરીય સમિતિ (HLC)ની રચના કરી છે, જે આ મુદ્દાની વિગતવાર તપાસ કરશે.

જામનગરમાં આયોજિત કાર્યક્રમમાં સાંસદ પૂનમબેન માડમ, શહેર અધ્યક્ષ બીનાબેન કોઠારી, મેયર વિનોદભાઈ ખીમસુરિયા, મુખ્ય વક્તા સંજય રાવલ, ભાજપ જિલ્લા અધ્યક્ષ ડૉ. વિનોદભાઈ ભેંડેરી અને ધારાસભ્ય રીવાબા જાડેજા ઉપસ્થિત રહ્યા હતા. આ ઉપરાંત, શહેરના શ્રેષ્ઠીઓ, ઔદ્યોગિક સંસ્થાઓ, વ્યાપારી સંગઠનો અને સેવાકીય સંસ્થાઓના હોદ્દેદારો મોટી સંખ્યામાં હાજર રહ્યા. સંજય રાવલે પોતાના ઉદ્બોધનમાં આ નીતિના ફાયદા અને તેનાથી દેશના વિકાસને મળનારા વેગની વાત કરી.

આ કાર્યક્રમમાં ‘વન નેશન, વન ઈલેક્શન’ને જામનગરની વિવિધ સામાજિક, ધાર્મિક અને વ્યાપારી સંસ્થાઓએ સમર્થન આપ્યું. આ નીતિને લઈને દેશભરમાંથી પણ સકારાત્મક પ્રતિસાદ મળી રહ્યો છે. આગામી સમયમાં સમિતિના અહેવાલ અને પ્રજાના મંતવ્યોના આધારે આ નીતિનો અમલ થશે, જે ભારતના લોકશાહી ઈતિહાસમાં એક નવો અધ્યાય ઉમેરશે.