News of Wednesday, 9th April 2025
મોરબીમાં ખનીજ માફિયા બેફામ : એક વર્ષમાં ખનીજ ચોરીના બનાવોમાં ધરખમ વધારો

(પ્રવિણ વ્યાસ દ્વારા) મોરબી, તા.૯: મોરબી જિલ્લામાં વાંકાનેર, મોરબી અને હળવદ પંથકમાં વ્યાપક પ્રમાણમાં ખનીજ ચોરી થાય છે અહીં ધરતીના પેટાળમાં સાદી અને ભોગાવો પ્રકારની ઉચ્ચ ગુણવત્તાવાળી રેતીની રેતમાફિયાઓ બેફામપણે ચોરી કરી રાજકોટ, જામનગર સહિતના જિલ્લામાં ઠાલવી રહ્યા છે. એ જ રીતે વાંકાનેર તાલુકામાં લાઇમ સ્ટોન, સેન્ડસ્ટોન, ફાયર ક્લે અને ચાઈના ક્લેનો વીશાળ જથ્થો ધરતીના પેટાળમાં ધરબાયેલો હોય ખનીજ માફિયાઓને અહીં ખનીજ ચોરીની ધીકતી આવક છે. એ જ રીતે માળીયા અને ટંકારા તાલુકામાં પણ ખનીજ ચોરીનું પ્રમાણ ખુબ ઉંચુ હોય ખાણખનીજ વિભાગે વર્ષ ૨૦૨૪-૨૫માં જિલ્લામાં કુલ મળી ૨૫૨ કેસ કરી ૫.૫૯ કરોડ રૂપિયા દંડ વસુલ કરી બે કિસ્સામાં કોર્ટ કેસ અને એક ફોજદારી ફરિયાદ નોંધાવી હતી.
જો કે, વર્ષ ૨૦૨૩-૨૪માં મોરબી જિલ્લામાં ખાણખનીજ વિભાગે કુલ મળી ૨૨૩ કેસ કરી ખનીજચોરીના કિસ્સા ઝડપી લઈ કુલ રૂપિયા ૬.૧૪ કરોડ રૂપિયાથી વધુની વસુલાત કરી હતી.ઉલ્લેખનીય છે કે, મોરબી જિલ્લામાં ખાણખનીજ વિભાગની હિલચાલ ઉપર બાજનજર રાખવા ખનીજ માફિયાઓએ ખાસ બ્રિગેડ બનાવી છે જે જિલ્લા સેવાસદનમાં જ પડી પાથરી રહેવાની સાથે જ્યાં-જ્યાં ખનિજ વિભાગની ટિમ મુવમેન્ટ કરે તે તમામ સ્થળે સતત પીછો કરી ખાણખનીજ વિભાગની રજે-રજની વિગતો વોટ્સએપ ગ્રુપ મારફતે ખનીજચોરી કરતા તત્વો સુધી ઓડિયો મેસેજ રૂપે પહોંચાડે છે, જેને પરિણામે અનેક ઝુંબેશ નિષ્ફળ નીવડતી હોવાનું અને રેઇડ સમયે ખનીજચોરી વાહનોમાં ભરેલ ખનીજ-માટી રોડ ઉપર ઠાલવી નાસી જતા હોવાના પણ બનાવો સતત બની રહ્યા છે.(૨૩.૧૧)
(12:19 PM IST)









છેલ્લા 8 દિવસમાં સૌથી લોકપ્રિય 
