અમરેલી : ગુજરાતમાં બે દિવસથી ચાલી રહેલા કમોસમી વરસાદે રાજ્યના 15થી વધુ જિલ્લાઓમાં તબાહી મચાવી છે. આજે બપોર બાદ અમરેલી જિલ્લામાં ધોધમાર વરસાદ વરસ્યો, જેના કારણે સાવરકુંડલાના નાળ ગામની સ્થાનિક નદીમાં પૂરની સ્થિતિ સર્જાઈ છે. વેસ્ટર્ન ડિસ્ટર્બન્સની અસરને કારણે રાજ્યના વાતાવરણમાં આ પલટો આવ્યો છે. હવામાન વિભાગે અમરેલી જિલ્લામાં ભારે વરસાદનું રેડ એલર્ટ જાહેર કર્યું છે, જે ખેડૂતો અને સ્થાનિકો માટે ચિંતાનું કારણ બન્યું છે.

સૌરાષ્ટ્ર અને દક્ષિણ ગુજરાતમાં વરસાદની આફત

અમરેલી જિલ્લાના લાઠી, સાવરકુંડલા, લીલીયા અને રાજુલા તાલુકાઓમાં વીજળીના કડાકા અને ભારે પવન સાથે કમોસમી વરસાદે તબાહી મચાવી છે. લાઠી શહેરમાં એક કલાકથી વધુ સમય સુધી સતત વરસાદ વરસ્યો, જ્યારે કરા પડવાથી વાતાવરણ ઠંડુગાર બન્યું છે. સાવરકુંડલાના નાળ, રબારીકા, મોટા ભમોદરા, જાબાળ અને ખાંભા ગીરના ખડાધાર, બોરાળા, ગીદરડી જેવા ગામોમાં ધોધમાર વરસાદે રસ્તાઓ પર પાણી ફરી વળ્યા છે. લીલીયા પંથકમાં નાવલી નદીમાં પાણી વહેવા લાગ્યું છે, જ્યારે રાજુલાના ડુંગર, માંડલ, ડોળિયા અને બાલાપરમાં પણ ભારે વરસાદ નોંધાયો છે. અમરેલી શહેરમાં પણ ઝાપટા સાથે વીજળીના કડાકા જોવા મળ્યા.

આ વરસાદના કારણે અનેક વૃક્ષો ધરાશાયી થયા છે, અને કેરી, ડુંગળી, બાજરી જેવા પાકોને મોટું નુકસાન થવાની ભીતિ છે. રાજ્યમાં છેલ્લા 10 કલાકમાં 51 તાલુકાઓમાં કમોસમી વરસાદ નોંધાયો છે, જેમાં લાઠીમાં 2 કલાકમાં 1 ઈંચ, ભાવનગરના મહુવામાં 1 ઈંચ, કચ્છના નખત્રાણામાં પોણા ઈંચ અને જલાલપોર, ઉમરપાડામાં અડધો ઈંચ વરસાદ પડ્યો છે. દક્ષિણ ગુજરાતના તાપી અને ડાંગમાં પણ ભારે પવન સાથે વરસાદ ચાલુ છે, જેના કારણે સ્થાનિકો અને ખેડૂતોમાં ચિંતાનો માહોલ છે.