જામનગર: જામનગર તાલુકાના દિગ્વીજયગ્રામ ગામ આજે વિકાસના નવા સીમાચિહ્નોનો સાક્ષી બન્યું. રાજ્યના કૃષિ, પશુપાલન, ગૌસંવર્ધન, મત્સ્યોદ્યોગ, ગ્રામ વિકાસ અને ગ્રામ ગૃહનિર્માણ વિભાગના મંત્રી રાઘવજીભાઈ પટેલના હસ્તે ગામમાં ₹૧૦ લાખથી વધુના ખર્ચે નિર્માણ પામેલ વિવિધ વિકાસ કાર્યોનું ઉષ્માભર્યું લોકાર્પણ કરવામાં આવ્યું હતું.
મહેશ્વરી સમાજને નવી સુવિધાની ભેટ
આ વિકાસ કાર્યોમાં મુખ્યત્વે મહેશ્વરી સમાજ વાડીના નવનિર્મિત રૂમનો સમાવેશ થાય છે, જે ₹૭,૮૯,૩૭૧ના ખર્ચે તૈયાર કરવામાં આવ્યો છે. આ ઉપરાંત, રૂમની બાજુમાં ₹૨,૩૮,૫૪૦ લાખના ખર્ચે નાખવામાં આવેલ શેડના કામોનું પણ લોકાર્પણ કરવામાં આવ્યું હતું. મંત્રી રાઘવજીભાઈ પટેલે આ પ્રસંગે જણાવ્યું હતું કે, આ કામ થવાથી મહેશ્વરી સમાજના લોકોને ઘણી સુવિધા મળશે અને સામાજિક પ્રવૃત્તિઓ માટે વધુ સારી જગ્યા ઉપલબ્ધ થશે.
આ કાર્યક્રમમાં મંત્રી રાઘવજીભાઈ પટેલ સાથે હાપા માર્કેટિંગ યાર્ડના ચેરમેન મુકુન્દભાઈ સભાયા, અગ્રણીઓ કુમારપાળસિંહ રાણા, મહેન્દ્રસિંહ જાડેજા, સરપંચ જગદીશભાઈ, તેમજ અન્ય સ્થાનિક અગ્રણીઓ અને અધિકારીઓ સહિત મોટી સંખ્યામાં ગ્રામજનો ઉપસ્થિત રહ્યા હતા. આ લોકાર્પણ સમારોહ ગામના વિકાસ પ્રત્યે સરકારની પ્રતિબદ્ધતા દર્શાવે છે.