પરેશ પારેખ દ્વારા, પોરબંદર, 14 જૂન 2025: તાજેતરમાં અમદાવાદ ખાતે થયેલી કરુણ વિમાન દુર્ઘટનામાં અવસાન પામેલા તમામ દિવંગત આત્માઓની શાંતિ માટે અને તેમને શ્રદ્ધાંજલિ અર્પણ કરવા માટે પોરબંદરમાં એક શાંતિ હવનનું આયોજન કરવામાં આવ્યું છે. આ શોકાંજલિ કાર્યક્રમ પાયોનિયર ક્લબ, પાયોનિયર ક્લબ લેડીઝ વિંગ અને રેડ ક્રોસ સોસાયટી તાલુકા શાખા દ્વારા સંયુક્તપણે યોજાશે.
આ શાંતિ હવન તા. 16 જૂન, 2025 ને સોમવારના રોજ સવારે 9 થી 10:30 કલાક દરમિયાન આર્યસમાજ, પોસ્ટ ઓફિસ રોડ, પોરબંદર ખાતે યોજાશે.
આ ભયાનક દુર્ઘટનામાં આપણે જે સ્વજનો ગુમાવ્યા છે, તેમની આત્માને શાંતિ મળે અને તેમના પરિવારોને આ આઘાત સહન કરવાની શક્તિ મળે તે માટે આ હવનનું આયોજન કરવામાં આવ્યું છે.
પાયોનિયર ક્લબના પ્રવીણભાઈ ખોરાવા, પાયોનિયર ક્લબ લેડીઝ વિંગના ઉમાબેન ખોરાવા અને રેડ ક્રોસ સોસાયટી તાલુકા શાખાના રામદેભાઈ મોઢવાડીયા દ્વારા તમામ પોરબંદરવાસીઓને આ પવિત્ર હવનમાં આહુતિ આપવા માટે નમ્ર વિનંતી કરવામાં આવી છે. આ દુઃખની ઘડીમાં સૌ સાથે મળીને દિવંગતોને શ્રદ્ધાંજલિ અર્પી શકે તે માટે આ કાર્યક્રમનું વિશેષ મહત્ત્વ છે.