આજે બપોર બાદ સૌરાષ્ટ્રના અનેક જિલ્લાઓમાં મેઘરાજાએ ધમાકેદા એન્ટ્રી કરી છે. ખાસ કરીને અમરેલી, ભાવનગર, બોટાદ, રાજકોટ અને સુરેન્દ્રનગર સહિતના જિલ્લાઓમાં બપોર બાદ વાદળછાયા વાતાવરણ વચ્ચે ઝરમરથી માંડીને ધોધમાર વરસાદ તૂટી પડ્યો હતો.

સામાન્ય રીતે ગુજરાતમાં 15 જૂનની આસપાસ ચોમાસાની શરૂઆત થતી હોય છે. આજે 14 જૂન છે, ત્યારે સૌરાષ્ટ્રના કેટલાક જિલ્લાઓમાં દિવસભરના અસહ્ય બફારા બાદ બપોર પછી આકાશ કાળા ડિબાંગ વાદળોથી ઘેરાઈ ગયું હતુ. સૌરાષ્ટ્રના કેટલાક ભાગોમાં વીજળીના કડાકાભડાકા સાથે ધોધમાર વરસાદ વરસ્યો હતો.

અચાનક વરસેલા વરસાદના કારણે વાતાવરણમાં ઠંડક પ્રસરી જતાં અસહ્ય ઉકળાટથી લોકોને રાહત મળી છે. આ સાથે જ વરસાદની શરૂઆત થતાં ખેડૂતોમાં પણ ખુશીની લહેર વ્યાપી ગઈ છે. ખેતી પ્રધાન સૌરાષ્ટ્રમાં વરસાદનું વહેલું આગમન ખેડૂતો માટે શુભ સંકેત માનવામાં આવે છે. આગોતરા વરસાદના કારણે વાવણી માટે અનુકુળ વાતાવરણ બનશે અને ખેડૂતો સમયસર વાવણી કરી શકશે.