(વિનોદ ગાલા દ્વારા)ભુજ તા.૯ :  રાજ્યમાં દારૂબંધી સામે સરકારની કડક કાર્યવાહીની જાહેરાતો વચ્ચે ઝડપાતા દારૂના જથ્થાનો આંક કચ્છ જેવા એક છેવાડાના જિલ્લામાં હવે લાખોને ટપાવી કરોડને આંબે છે. 

         આ કડવી વાસ્તવિકતા વચ્ચે ગત તા.૨૬/૬ ના પશ્ચિમ કચ્છ પોલીસની આંખ નીચે છેક ગાંધીનગરથી આવેલ સ્ટેટ મોનિટરીંગ સેલની પોલીસે દારૂના કટિંગ સમયે જ કેરા (ભુજ) પાસેથી ૧.૨૮ કરોડનો દારૂનો જંગી જથ્થો ઝડપી પાડયો હતો.

           ત્યારે એસએમસીના દરોડામાં બુટલેગર અનોપસિંહ અભેસિંહ રાઠોડ વોન્ટેડ હોવા છતાંય ફરી આ જ બુટલેગર અનોપસિંહનો દારૂનો ૨૭ લાખનો બીજો જથ્થો પશ્ચિમ કચ્છ એલસીબીએ ઝડપ્યો હતો.

             ત્યારે પણ બુટલેગર અનોપસિંહ ને ઝડપવામાં સ્થાનિક પોલીસ નિષ્ફળ રહી હતી. આ બધા વચ્ચે રાજસ્થાનથી ગુજરાતના બનાસકાંઠામા અમીરગઢ પાસે ૯૫.૨૭ લાખનો દારૂ ઝડપાયો હતો તેમાં અનોપસિંહનું નામ ખુલ્યું હતું.