(કૌશલ સવજાણી દ્વારા)ખંભાળિયા તા.૧૫ : દેવભૂમિ દ્વારકા જિલ્લો ભારતની પશ્ચિમી આંતરરાષ્ટ્રીય સરહદે વિશાલ સાગરકાંઠે ધરાવતો અતિ સંવેદનશીલ જિલ્લો છે. જગ પ્રસિદ્ધ દ્વારકાધીશ મંદિરમાં જન્માષ્ટમી તેમજ હોળી જેવા તહેવારો દરમ્યાન બહોળી સંખ્યામાં શ્રદ્ધાળુઓ દર્શનાર્થે આવતા હોય છે. ત્યારે મંદિર પરિસરમાં શાંતિ અને સલામતી જળવાય તે હેતુથી અધિક જિલ્લા મેજિસ્ટ્રેટ શ્રી, દેવભૂમિ દ્વારકાના તા. ૦૫/૦૮/૨૦૧૪ના

 પ્રસિદ્ધ કરાયેલા જાહેરનામાંથી દ્વારકાધિશ મંદિરમાં કોઈપણ ક્ષયકારી અથવા સ્ફોટક પદાર્થો લઈ જઈ શકાય તેવી ચીજો જેવી કે કેમેરા/ડિઝિટલ કેમેરા, મોબાઈલ ફોન, કેમ કોડર/વિડિયો શુટીંગ કરવાના ઈલેક્ટ્રોનિક્સ ઉપકરણો કે શંકાસ્પદ પદાર્થો/વસ્તુઓ વિગેરે લઈ જવા પર પ્રતિબંધ મુકવામાં આવ્યો હતો. 

જેમાં જિલ્લાના મહેસુલી, પંચાયત અને પ્રોટોકોલ સંબંધિત હુકમ અન્વયે ફરજ પરના અધિકારીશ્રી/કર્મચારીઓને જાહેરનામામાંથી મુક્તિ આપવા નાયબ કલેક્ટર અને વહીવટદારશ્રી, શ્રી દ્વારકાધીશ મંદિર દ્વારા કરાયેલી દરખાસ્ત સબબ જિલ્લા મેજિસ્ટ્રેટ, દેવભૂમિ દ્વારકાને ગુજરાત પોલીસ અધિનિયમ-૧૯૫૧ની કલમ- ૩૭(૧) તળે મળેલ સત્તાની રૂએ વહીવટદારશ્રી શ્રીદ્વારકાધિશ મંદિર, દ્વારકા, નાયબ વહીવટદારશ્રી શ્રીદ્વારકાધિશ મંદિર,  દ્વારકા તથા દેવભૂમિ દ્વારકા જિલ્લામાં ફરજ બજાવતા તમામ નાયબ કલેક્ટરશ્રી અને મામલતદારશ્રી (પ્રોટોકોલ) સહીતના મામલતદારશ્રીને તા. ૦૫/૦૮/૨૦૧૪ના પ્રસિદ્ધ કરાયેલા જાહેરનામામાંથી મુક્તિ આપવામાં આવે છે.

ઉપરાંત, પ્રાંત અધિકારીશ્રી દ્વારકા/કલેક્ટર કચેરી, દેવભૂમિ દ્વારકા તરફથી જે-તે ઇવેન્ટ અનુસંધાને જેમને ફરજ સોંપવામાં આવી હોય તેવા વર્ગ-૩ના કર્મચારીઓને સંદેશાવ્યવહાર અને સંકલન માટે મોબાઈલની અનિવાર્ય આવશ્યકતાનુ આંકલન કરી પ્રાંત અધિકારીશ્રી, દ્વારકા દ્વારા જે - તે ઇવેન્ટ પુરતી અલગથી પરવાનગી આપવામાં આવી હોય તેવા વર્ગ-૩ ના કર્મચારીઓને જે - તે ઇવેન્ટ પુરતી આ જાહેરનામામાંથી મુક્તિ આપવામાં આવશે. 

ઉપરાંત તા. ૦૫/૦૮/૨૦૧૪ના પ્રસિદ્ધ કરાયેલા જાહેરનામાંની અન્ય તમામ વિગતો યથાવત રહેશે.