મુકુંદ બદીયાણી દ્વારા, જામનગર, ૨૬ જુલાઈ : ભારતીય ટેસ્ટ ટીમના મેનેજર દ્વારા ત્રીજી ટેસ્ટ મેચમાં હાર માટે રવિન્દ્ર જાડેજાની 'ખૂબ ધીમી રમત' ને જવાબદાર ઠેરવતા વાયરલ થયેલા એક વિડીયો બાદ, જામનગરના જામસાહેબે આ મામલે પોતાની પ્રતિક્રિયા આપી છે. તેમણે જાડેજાનો પક્ષ લેતા જણાવ્યું છે કે, આવી ગંભીર પરિસ્થિતિમાં ટકી રહેવું એ જ બેટ્સમેન માટે પ્રથમ વિકલ્પ હોય છે અને રન બનાવવું ગૌણ વિકલ્પ છે. જાડેજાની ટીકા કરનારાઓને તેમણે આકરો જવાબ આપતા તેની ટીમ ભાવનાને બિરદાવી છે.
જામસાહેબનું વિશ્લેષણ: ધીમી રમત નહીં, જવાબદાર રણનીતિ
જામસાહેબે પોતાના નિવેદનમાં જણાવ્યું છે કે, "વાયરલ થયેલા એક વિડીયો મુજબ, મને સમજાયું છે કે ભારતીય ટેસ્ટ ટીમના મેનેજરે રવિન્દ્ર જાડેજાને ત્રીજી ટેસ્ટ હાર માટે ખૂબ ધીમી રમતનો દોષ આપ્યો છે. એક તબક્કે મને પણ એવું લાગ્યું કે જાડેજા વધુ મુક્તપણે રન બનાવી શક્યો હોત, પરંતુ કાળજીપૂર્વક ફરીથી વિચાર કર્યા પછી મને સમજાયું કે ભારત ખૂબજ કમનસીબ ગંભીર પરિસ્થિતિનો સામનો કરી રહ્યું છે, જેમાં સહેજ પણ શંકા વિના, બેટ્સમેન માટે પ્રથમ વિકલ્પ ટકી રહેવાનો હતો અને રન બનાવવા એ ચોક્કસપણે ગૌણ વિકલ્પ હતો."
તેમણે ઉમેર્યું કે, "જો જાડેજાએ ક્રોસ બેટેડ (Cross Batted) શોટ અને છક્કા દ્વારા ઝડપી સ્કોર કરવાની કોશિશ કરી હોત તો તે ‘ટીમ’ના હિતમાં ખૂબજ બેજવાબદાર લેખાત. તેથી, મારા મનમાં કોઈ શંકા નથી, અને મને ખાતરી છે કે કોઈપણ સિદ્ધહસ્ત ક્રિકેટરના મનમાં, જાડેજાએ તેની સામાન્ય રમતને ધીમી કરી અને જોખમી શોટ રમવાનું ટાળ્યું તે તેના તરફથી ખૂબજ જવાબદાર હતું જેના માટે તે અભિનંદનને પાત્ર છે અને આપણે તેની ટીમ ભાવનાની પ્રશંસા કરવી જોઈએ."
જામસાહેબે વધુમાં ઇંગ્લેન્ડ ટેસ્ટ ટીમના કેપ્ટનની રમતગમતની ભાવનાની પણ પ્રશંસા કરી. તેમણે કહ્યું, "હું એ પણ નિર્દેશ કરવા માંગુ છું કે વિપક્ષી ઇંગ્લેન્ડ ટેસ્ટ ટીમના કેપ્ટને અસાધારણ રમતગમતનું પ્રદર્શન કર્યું હતું અને જાડેજાના મહાન પ્રયાસોને સ્વીકાર્યા હતા, જે કાર્ય મારા જાણીતા રમતગમતના સૌથી મહાન કાર્યોમાંનો એક હતો; ખાસ કરીને ક્રિકેટમાં જે જેન્ટલમેન સ્પોર્ટ માનવામાં આવે છે."
પોતાના નિવેદનના અંતમાં જામસાહેબે ક્રિકેટના મહાન ખેલાડી વિનુ માંકડને યાદ કરતા જણાવ્યું, "મને ખબર નથી કે પ્રખ્યાત લોર્ડ્સ ટેસ્ટ મેચમાં તેમણે જે અસાધારણ પ્રયાસો દર્શાવ્યા હતા તેમાં મહાન વિનુ માંકડનું પણ આટલી અદ્ભુત રીતે સન્માન કરવામાં આવ્યું નહતું?!"
જામનગરના જામસાહેબનું આ નિવેદન ક્રિકેટ જગતમાં અને ખાસ કરીને રવિન્દ્ર જાડેજાના ચાહકોમાં ચર્ચાનો વિષય બન્યું છે, જે જાડેજાના પ્રયાસોને યોગ્ય સન્માન આપવાની વાતને સમર્થન આપે છે.