તા. ૧૮ નવેમ્બર ર૦ર૬ વિક્રમ સંવત ર૦૮૩ કારતક સુદ – ૯ બુધવાર
News of Tuesday, 12th August 2025
અમરેલી તાલુકા પી.આઈ. જાડેજાએ બતાવી માનવતા : રાત્રે બંધ કારને ધક્કો મારી એક પરિવારની કરી મદદ
ઇન્સ્પેક્ટર ઓમદેવસિંહ જાડેજાએ ‘પોલીસ પ્રજા મિત્ર’એ સૂત્રને ખરા અર્થમાં સાર્થક કરી બતાવ્યું

અમરેલી તાલુકા પોલીસના ઇન્સ્પેક્ટર ઓમદેવસિંહ જાડેજાએ ‘પોલીસ પ્રજા મિત્ર’એ સૂત્રને ખરા અર્થમાં સાર્થક કરી બતાવ્યું છે. અમરેલીના માળીલા ફાટક નજીક રાત્રે એક પરિવાર તેમની કાર બંધ પડી જવાથી પરેશાન હતો. આ પરિવારમાં મહિલા અને અન્ય સભ્યો હતા, જેઓ રાત્રે અટવાઈ ગયા હતા અને તેમની પાસે કોઈ મદદનો વિકલ્પ નહોતો
આ દરમિયાન રાત્રિના પેટ્રોલિંગ દરમિયાન પી.આઈ. ઓમદેવસિંહ જાડેજા આ સ્થળે પહોંચ્યા હતા. તેમણે પરિસ્થિતિનો તાગ મેળવીને તાત્કાલિક પોતાની ટીમ સાથે બંધ પડેલી કારને ધક્કો માર્યો અને તેને ચાલુ કરાવી હતી. આમ અડધી રાત્રે પરિવાર માટે જાડેજા દેવદૂત બનીને આવ્યા હતા
આ ઘટનાનો વીડિયો સ્થાનિક લોકો દ્વારા રેકોર્ડ કરવામાં આવ્યો હતો, જે સોશિયલ મીડિયા પર વાયરલ થયો છે. વીડિયોમાં પી.આઈ. જાડેજા અને તેમની ટીમ રાત્રે ખભેખભો મિલાવીને કારને ધક્કો મારતા જોવા મળે છે, જેના કારણે પરિવારની મુશ્કેલી દૂર થઈ હતી. આ ઘટનાએ પોલીસની માનવીય બાજુને ઉજાગર કરી છે અને સમાજમાં પોલીસ પ્રત્યેનો વિશ્વાસ વધાર્યો છે.
આ ઘટનાએ અમરેલીના સ્થાનિક લોકોમાં પોલીસ વિભાગ પ્રત્યે સકારાત્મક લાગણી જગાવી છે. સોશિયલ મીડિયા પર વીડિયો વાયરલ થયા બાદ નાગરિકોએ પી.આઈ. ઓમદેવસિંહ જાડેજાની પ્રશંસા કરી છે. ઘણા યુઝર્સે ટિપ્પણી કરી કે આવા પોલીસ અધિકારીઓ સમાજ માટે ગૌરવની વાત છે. આ ઘટના એ પણ દર્શાવે છે કે પોલીસ માત્ર કાયદો અને વ્યવસ્થા જાળવવા માટે જ નહીં, પરંતુ પ્રજાની મુશ્કેલીઓમાં પણ સાથ આપવા માટે હંમેશા તૈયાર છે.
અમરેલી પોલીસે અગાઉ પણ આવી અનેક ઘટનાઓમાં માનવીય અભિગમ દર્શાવ્યો છે, જેમ કે ખોવાયેલા બાળકોને તેમના પરિવાર સાથે મિલન કરાવવું કે રસ્તા પર અટવાયેલા લોકોને મદદ કરવી. આ ઘટના બાદ સ્થાનિક વહીવટ અને પોલીસ વિભાગે પી.આઈ. જાડેજાની કામગીરીની નોંધ લીધી છે, અને તેમનું આ કાર્ય અન્ય પોલીસ અધિકારીઓ માટે પણ પ્રેરણાદાયી બની શકે છે. સ્થાનિક લોકો પણ પોલીસની આ માનવીય કામગીરીને બિરદાવી રહ્યા છે.
વર્તમાન સમયમાં પોલીસની નકારાત્મક બાબાતો સમાચારો પત્રોમાં પણ ખુબ જ ચમકતી હોય છે. જોકે, પોલીસ દ્વારા અનેક સારા કામ કરવામાં આવતા હોય છે પરંતુ તેને કવર કરવામાં આવતી નથી. તેથી પોલીસની છાપ એક વિલન તરીકેની પડી ગઈ છે. આપણા ગુજરાતમાં પોલીસ સ્ટેશનમાં પહોંચતા મોટા ભાગના કેસોમાં પોલીસ પાસે રહીને સમસ્યાનો ઉકેલ લાવતી જોવા મળી છે. આમ પોલીસ પોતાની જવાબદારી નિભાવવાની સાથે-સાથે લોકોને સમજાવીને લડાઈ-ઝગડાઓમાં પણ શાંતિ-સૂલેહ કરાવતી રહી છે.
(12:06 AM IST)









છેલ્લા 8 દિવસમાં સૌથી લોકપ્રિય 
